حوالکاری بشخ انا شونداری کن کاریم مننگ ءِ، مٹھا خان کاکڑ

کوئٹہ : صوبائی وزیر شینکاری مٹھا خان کاکڑ پارینے کہ صوبہ ٹی شینکاری و میڈیا نا بشخ ءِ شون تننگ کن گام گیج کننگ انگ ءِ۔ انتئے کہ صوبہ نا شونداری ٹی محکمہ شینکاری و میڈیا نا کڑد ءِ پین فعال و پوسکنی اتنگ نا گرج ءِ۔ بنجائی کہول آ میڈیا صوبہ ءِ جوان نمائندگی ایتے۔ صوبائی وزیر تدوک آ دے محکمہ تعلقات عامہ بلوچستان نا دفتر نا دورہ ءِ کرے و محکمہ نا کارکڑد ءِ خنا۔ او وخت آ سیکریٹری شینکاری حمزہ شفقات و ڈائریکٹر جنرل تعلقات عامہ بلوچستان نا مراناسد تون اوار محکمہ نا افسرک ہم ساڑی ئسر۔ صوبائی وزیر پارینے کہ محکمہ نا کارکڑد ستا کڑزک۔ اودے پین شونداری تننگک و دانا ویل آتے زوت اس ایسر کننگک۔ او پارینے کہ صوبہ نا اُلس نا حق و شونداری نا پورو کوریج مرے۔ دا بابت اٹ وسیلہ غاتا کمتی ءِ ہر حالیت اٹ مر کننگک۔ او پارینے کہ ننے حقیقت ءِ امنا کروئی تمک۔ صوبہ نا پسماندگی ٹی اسہ بھلو ویل اس ملکی کہول آ شینک مننگ اٹی اف۔ و نہ اُلس نا حق آتیکن میڈیا مناسب کہول آ نمائندگی تسنے۔ او پارینے کہ دا ستا کڑزک کہ دا جوان ءُ کاریم اسے کہ محکمہ نا سیکریٹری و ڈائریکٹر جنرل کہنہ مشق، تجربہ کار و محنتی ءِ۔ اوفتا لائخی تیان کاریم ہلنگ کن اوفک و صوبائی حکومت محکمہ ءِ ہر وڑ اٹ کمک فراوان کیک۔

(خ ن)