جامعہ بلوچستان تعلیمی آب انا گچینی کن گام گیج کننگ ءِ، وائس چانسلر

جامعہ بلوچستان نا وائس چانسلر پروفیسر ڈاکٹر ظہور احمد بازئی پارینے کہ جامعہ بلوچستان تعلیمی آب انا گچینی، شفاف مالیاتی نظام، آب اٹ پٹ وپول و گچین گورننس نا مونی دننگ کن عملی گام گیج کننگ ءِ۔ دا ہیت ءِ او دوشنبے نادے آ جامعہ بلوچستان نا 99می سنڈیکیٹ دیوان نا کماشی ءِ کرسا کرے۔ دیوان اٹ جامعہ نا بابت چندی تعلیمی، مالی و انتظامی باندات آتیا سجفنگا، وخت اس کہ مالیاتی باندات‘ فیکلٹی نا بابت باندات، تدریسی پروگرام، پالیسی تیا اولسرجاچ و ایلو ادارہ ئی اصلاحات آ تیا گپ و تران مس۔ دیوان اٹ اکیڈمک کونسل، فنانس اینڈ پلاننگ کمیٹی، سلیکشن بورڈ، ای آفس سسٹم نا باندات و جتا جتا مفاہمت نا یادداشت آتیا دیوان تا منٹس آتا منظوری ءِ تننگا۔ دیوان اٹ وائس چانسلر پارے کہ جامعہ بلوچستان تعلیمی آب انا گچینی،آب اٹ پٹ وپول وگچین گورننس نا مونی دننگ کن عملی گام گیج کننگ ءِ۔ او سنڈیکیٹ نا باسک آتا فعال کڑد انا ستاءِ کرسا دا عزم انا درشانی ءِ کرے کہ جامعہ ءِ تدریس، پٹ وپول و پوسکنوڑ بشخ اٹ پین شونداری نا کنڈآ دننگک۔ سنڈیکیٹ نا باسک آک جامعہ نا شونداری و بڑزکو تعلیم نا مونی دننگ کن ہر وڑ انا کمک نا باوری کرفسا وائس چانسلر نا کماشی و اصلاحاتی گام گیج آتا ستاءِ کریر۔ دیوان اٹ پرو وائس چانسلر پروفیسر ڈاکٹر غلام رزاق شاہوانی، رجسٹرار گل محمد کاکڑ، ٹریژرر خوشحال خان، فنانس ڈیپارٹمنٹ آن ڈاکٹر منصور بلوچ، ایڈیشنل سیکرٹری کالجز، ہائر اینڈ ٹیکنیکل ایجوکیشن ڈیپارٹمنٹ بلوچستان جہانزیب خان مندوخیل، جتا جتا فیکلٹی تا ڈین، ڈائریکٹر، سنڈیکیٹ نا باسک و جامعہ نا افسر آک بشخ ہلکر۔