عبدالرزاق خلجی نا مسٹر ایشیاء جوڑ مننگ ستا کڑزک، مینا مجید بلوچ

صوبائی سلاہکار گوازی و ورنا باندات مینا مجید بلوچ تھائی لینڈ اٹی اڈ ہلوک ورلڈ مین فزیک چمپین شپ اٹی مسٹر ایشیاء نا اعزاز دوئی کروک پنی آ باڈی بلڈر عبدالرزاق خلجی ءِ اونا شانی آ سرسہبی آ خراجِ تحسین پیش کرے۔ دا وخت آ صوبائی سلاہکار عبدالرزاق خلجی ءِ اونا جہانی سرسہبی نا امنائی اٹ میڈل بیرفے و سرٹیفکیٹ آف اپریسی ایشین ہم تس، داوخت آ سیکرٹری اسپورٹس درا بلوچ و ڈی جی یاسر خان بازئی ہم ساڑی ئس۔ مینا مجید بلوچ پارے کہ عبدالرزاق خلجی تینا خواری، استخواہی و بے کچ لائخی اٹ نئے بیرہ بلوچستان بلکن مچ آ پاکستان کن اعزاز دوئی کرینے، دا وڑ انا گوازی گر ورنا چین اکن اسہ جوان ءُ درور اسے ءُ و اوفتا سرسہبیک دا ہیت انا شاہدی ءُ کہ بلوچستان نا ٹیلنٹ جہانی کہول آ تینا لائخی ءِ منفنگ نا پورو واکداری تخک۔