کل طبی ہند آتیٹی ڈاکٹر و ایلو کاریمی تا ساڑی گری ءِ پک کننگے،ایڈیشنل ڈپٹی کمشنر ریونیو گوادر

ڈپٹی کمشنر نقیب اللہ کاکڑ نا پارت آ ایڈیشنل ڈپٹی کمشنر ریونیو ظہور احمد بلوچ نا کماشی ٹی ڈسٹرکٹ ہیلتھ کمیٹی نا دیوان اڈ ہلک، ہراٹی مچ آ ضلع ٹی السی جانجوڑی نا حالیت، طبی آسراتی تا فراوانی، ادارہ ئی کارکڑد و مون تروک ویل آتا ایسری نا بابت جتا جتا باندات آتا سرجم جاچ ءِ ہلنگا۔ دیوان اٹی ضلعی افسر جانجوڑی ڈاکٹر یاسر، میر عبدالغفور ٹیچنگ ہسپتال نا نمائندہ ڈاکٹر جنبد بلوچ، ڈپٹی ڈی ایچ او ڈاکٹر فاروق بلوچ، سی ای او جی ڈی اے ہسپتال ڈاکٹر ناصر شیخ، ایکسین واپڈا، ڈسٹرکٹ منیجر پی پی ایچ آئی ڈاکٹر مرشد دشتی، ڈپٹی سی ای او عمانی گرانٹ ہسپتال ڈاکٹر حمید بلوچ، ڈرگ انسپکٹر و ایلو تعلقدار محکمہ غاتا نمائندہ غاک بشخ ہلکر۔ دیوان اٹی ضلع نا جانجوڑی نا بشخ ءِ مون تروک چیلنج، ہسپتال و جانجوڑی نا بنداوی ہند آتے ٹی دوئی آسراتی، طبی ازباب، دارو تا فراوانی، انسانی وسیلہ و الس ءِ آب اٹو طبی خذمت آتا فراوانی کن جتا جتا ایجنڈا ٹک آ سجفنگا۔ دیوان اٹی جانجوڑی نا نظام ءِ پین بھرمی و فعال کننگ کن جتا جتا سلاہ تیا سجفنگا و پاننگا کہ کل طبی ہند آتے ٹی ڈاکٹر و کارندہ غاتا حاضری ءِ پک کننگے و غیر حاضر افسر و ملازم آتا برخلاف قاعدہ و ضابطہ غاتا رِد اٹ سخت محکمانہ کارروائی کننگے۔ دیوان اٹی غیر حاضر طبی کارندہ غاتا برخلاف ڈسپلنری ایکشن و تنخواہ تے کاٹ کننگ نا باندات آ ہم سجفنگا۔ دیوان اٹی داسہ نا ڈینگی تور مہم نا جاچ ءِ ہلسا بریفنگ تننگا کہ ضلعی انتظامیہ و جانجوڑی محکمہ نا اسیجائی جہد آن ڈینگی وائرس نا تور اکن بھرمی اسپرے مہم چلینگانے ہرانا مثبت نتیجہ مون آ بسنے و ساڑی حالیت است جمی نا سوب ءِ۔ دا وخت آ ڈینگی تور سرجز آتے پدریسہ برجا تخنگ و السی آگاہی مہم ءِ پین بھرمی جوڑ کننگ آ زور شاغنگا۔ دیوان اٹی پاننگا کہ آب اٹنگا طبی خذمت آتا فراوانی ءِ پین بھرمی جوڑ کننگک تانکہ ضلع نا کل شاری تے جانجوڑی نا گچین آسراتی دوئی مننگ کے۔ ڈرگ انسپکٹر بریفنگ تس کہ ضلع نا کل میڈیکل اسٹور آک لیسن والا ءُ، ہراڑا ڈپٹی کمشنر پارت کرے کہ اسٹور تا جاچ اکن اسہ کمیٹی اس ٹہیفنگے و بے لیسن اسٹور آتے دمدستی وڑ اٹ سیل کننگے۔