جنگ بندی کن کوشست آک تیز، نواب رئیسانی وڈھ ءِ سر مس

وڈھ/ کوئٹہ/ اسلام آباد : چیف آف سرسوان نواب محمد اسلم رئیسانی ڈل اتون اوار خضدار آ سرمس ڈل اٹ نوابزادہ حاجی لشکری رئیسانی، نوابزادہ رئیس رئیسانی وایلو قبائلی متبر آک اوار ءُ‘ ڈل اٹ رئیسانی قبیلہ نا متبر آتتون اوار پشتون سرکڑدہ غاک ہم اوار ءُ۔ نواب اسلم رئیسانی تون کمشنر قلات ڈویژن داؤد خلجی و پولیس ناکمامدار آک اوڑدہی کریر۔ضلعی انتظامیہ و سکیورٹی کمامدار آک نواب اسلم رئیسانی ءِ وڈھ اٹ ہڑتوم آ پڑک آتا نیام اٹ بے چیٹی نا بابت معلومدار کریر۔ نواب اسلم رئیسانی، نوابزادہ لشکری رئیسانی،رئیس رئیسانی وایلوفک وڈھ اٹ سردار اسد مینگل و و میر شفیق مینگل تون اوڑدہی کریر‘ وڈھ اٹ بے چیٹی ءِ کم کرفنگ کن نواب رئیسانی تینا ڈل اتون اوار پڑک آتتون اوڑدہی کرے‘ دا بابت نواب رئیسانی سردار اسداللہ خان مینگل تون اوڑدہی کرے و بے چیٹی ءِ چٹفنگ نا بابت گپ وتران کرے‘ داکان گڈ نواب محمد اسلم رئیسانی تینا ڈل اتون اوار وڈھ باڈڑی مینگل ہاؤس آ سر مس و ہموڑے میر شفیق الرحمن مینگل تون اوڑدہی کرے‘ دا وخت آ او میر شفیق الرحمن تون ہم وڈھ اٹ برجا بے چیٹی ءِ چٹفنگ نا بابت ہیت وگپ کرے۔ وڈھ آ ہننگ آن مست نواب اسلم خان رئیسانی پارے کہ نن وڈھ آ سر مرسا ہموڑے امن نا بحالی وجنگ بندی اسکان ہموڑے مرینہ۔ میڈیا تون ہیت وگپ کرسا او پارے کہ ہڑتوم آکنڈآن ننا نسخان مننگ اٹی ءِ‘ نن خواپنہ کہ وڈھ اٹ کشت وخون مرے‘ نن فوٹو سیشن کن آخا بلکہ ویل ءِ پورو وڑ اٹ چٹفنگ کن ہننگ اٹی ان‘ ہڑتوم آ پڑک آتے بے چیٹی ءِ کم کننگ و جنگ بندی آ راضی کننگ کن کوشست کینہ‘ پڑک آتتون مصالحت نا کمک اٹ باندات ءِ چٹفنگ نا خواست کینہ۔ ایلو کنڈآ اسلام آباد اٹ ہندا وڑ اٹ وزیراعظم شہباز شریف تون بلوچستان نیشنل پارٹی (بی این پی) مینگل نا سروک سردار اختر مینگل اوڑدہی کرے‘ اوڑدہی نا وخت آ ملک انا ساڑی حالیت آتیا سلابت کننگا وخت اس کہ بلوچستان اٹ برجا شونداری ڈٹ و امن وایمنی نا حالیت آتیا ہم گپ وتران کننگا۔ وزیراعظم شہبازشریف بی این پی نا حکومت نا اصلاحاتی ایجنڈا نا اطلاق اٹ اہم کڑدار ادا کننگ ناستاءِ کرے۔ شہباز شریف ملکی گچینی کن حکومتی فیصلہ غاتا بی این پی نا مخ تفی کننگ نا منتواری ءِ ہرفے۔ اوڑدہی نا وخت آ بنجائی وزیر اسحاق ڈار، ایاز صادق، احسن اقبال و وزیراعظم ناسلاہکار احد چیمہ ساڑی ئس۔ داکان بیدس وڈھ انا حالیت آتا توار قومی اسمبلی نادیوان اٹ بننگا۔ بلوچستان آن قومی اسمبلی نا آجو باسک میر اسلم بھوتانی قومی اسمبلی نا دیوان اٹ پوائنٹ آف آرڈر آ ہیت وگپ کرسا پارے کہ بلوچستان ءِ دوارہ 5سال اکن لیز آ تننگ انگ ءِ‘ بلوچستان اٹ الس نا حکومت جوڑ مننگ کن النگے۔ داوخت آ قومی اسمبلی نا باسک محسن داوڑ پارے کہ وڈھ اٹ حالیت آک خراب ءُ۔ اختر مینگل ءِ شیف خلنگ نا کوشست کننگ انگ ءِ دادے توننگے‘ نن 75سال آن گردش اٹ پیری کننگ اٹی ان۔ او پارے کہ تحریک انصاف آ مقدمہ چلیفنگے ولے اونا تینائی تے ہرفنگ انگ ءِ ہراتم اونا حکومت مس تو اونا ردعمل بریک۔

(مانیٹرنگ ڈیسک/ حوالکار)