مسلم لیگ (ن) و پیپلز پارٹی نا نیام اٹ عئید آن پد اے پی سی بٹنگ آ امنا

 لاہور (آن لائن) پاکستان مسلم لیگ (ن) نا مسہ باسکی ڈل اس بلاول ہاﺅس اٹ پاکستان پیپلز پارٹی نا چیئرمین بلاول بھٹو زرداری تون اوڑدہی آن پد ملک انا ہڑتوم آ بھلا سیاسی جماعت آتا راہشونک میڈیا تون اواری ٹی ہیت وگپ کرسا پاریر کہ مروک آ اوڑدہی جوان مسنے، ہراٹی ساڑی حکومت نا پالیسی تا برخلاف و اُلس ءِ دوئی مروک آ ویل آتیان خلاصی کن اواری ٹی حکمت عملی اس جوڑ کننگ آ اوار مسونن۔ داڑتون اوار اوار آل پارٹیز کانفرنس اڈ تننگ آ ہڑتوم آ پارٹی تیٹی اواری ساڑی ءِ۔ پیپلز پارٹی سنٹرل پنجاب نا صدر قمر الزمان کائرہ و پاکستان مسلم لیگ (ن) نا راہشون احسن اقبال میڈیا تون ہیت وگپ کرسا پارینے کہ ساڑی حکمرانک تینا اِرا سال نا حکومت اٹ ملک نا حالیت آتے پین خراب کرینو۔ ملک و اُلس ءِ زرگزرانی کاختی نا کنڈ آ دکہ تسنو، او پارینے کہ پاکستان مسلم لیگ (ن) نا کنڈآن اڈ ہلوک آ آل پارٹیز کانفرنس اٹ ملک ءِ جتا جتا کاختی تیان کشنگ نا بابت اٹ ہیت مریک و حکمت عملی اس طے کننگک او پارینے کہ حکومت کشمیری تے بھارتی بیدادی تا مقابلہ ءِ کننگ کن تنیا ہلنگانے۔ راہشون تا پاننگ ئس کہ ساڑی حکومت ملک انا میڈیا تون ہم خراب ءُ رویہ سے ٹی مون تننگ اٹی ءِ۔ سینئر صحافی میر شکیل الرحمان ءِ بندی گری ءِ 4 تو گدرینگا ہرا میڈیا نا برخلاف بدلہ ہلوک ءُ کارروائی اسے۔ حکومت نا مرضی ءِ انت کے ولے اپوزیشن جماعت آک پدی مفسہ او نہ میڈیا نا آجوئی صحافت آ سمجھوتہ اس کیک۔