بلوچستان اٹ اسہ وار ولدا کشت و خون نا چرجوئی اس بنا کرینے، بی این پی

کوئٹہ ( آن لائن )بلوچستان نیشنل پارٹی نا راہشونک وڈھ اٹ بخال واپار، خاران اٹ عبدالخالق بلوچ و عبدالرشید نا خون نا مذمت ءِ کرسا پارینے کہ بلوچستان اٹ اسہ وار ولدا کشت و خون نا بازار جوان و ہڑدے نا بنداو آ جتا جتا ضلع غاتیٹی و تحصیل آتیٹی جتا جتا پن نا بے گناہ و بندغ آتا کسفنگ برجا ءِ، وخت اس کہ کمشنر ،ڈپٹی کمشنر و اسسٹنٹ کمشنر نا اختیار اف، انتظامیہ و ادارہ غاک پورو وڑ اٹ زہمی ءُ، و صوبائی حکومت نا کنڈآن بلوچستان سوشل میڈیا غا شونداری نا کسر آ شاغوک ءِ، نن سیاسی ءُ بندغ اُن و سیاسی جہد آ یقین کینہ، اسہ نا اہل ءُ حکومت اسے اُلس آ مسلط کننگانے، اسہ گچین ءُ ایم پی اے سے آن ڈیتھ اسکواڈ نا کماش ءِ مسہ کچ زیات فنڈ تننگانے، کارندہ غاتیان ہلیس کماش آتسکان کل تینا جان تے ندر کننگ کن تیار ءُ ولے صوبہ نا اُلس نا حق آتیا ہچ ءُ سودا بازی اس کننگ کن الیپنہ او نہ ہی کس اسے نا پریشر اٹی برینہ، اگہ اسہ ہفتہ سے ٹی حالیت آک سہی متوس تو برانزی تحریک اس بنا کینہ، دا خیال آتا درشانی ءِ بلوچستان نیشنل پارٹی نا سینئر نائب صدر ملک عبدالولی کاکڑ،صوبائی اسمبلی نا باسک میر اکبر مینگل پارٹی نا ایلو راہشون آ پارلیمانی لیڈر ملک نصیر احمد شاہوانی،موسیٰ بلوچ، صوبائی اسمبلی نا باسک آتیان ثناءبلوچ،ٹائٹس جانسن،غلام نبی مری،ٹکری شفقت لانگو و منیر جالب بلوچ تون کوئٹہ پریس کلب ٹی پریس کانفرنس آن تران کرسا ملک عبدالولی کاکڑ پارینے کہ بلوچستان اٹ اسہ وار ولدا کشت و خون نا بازار باسن اٹی ءِ، ہر ارٹمیکو دے آ بلوچستان نا جتا جتا ضلع و تحصیل آتیٹی جتا جتا پن تیٹی مظلوم وبے گناہ آ بندغ آتا کسفنگ برجا ءِ، صوبائی حکومت نا کنڈآن بلوچستان سوشل میڈیا غا شونداری نا کسر آ تمانے، ایہن تو حکومتی نا اہلی نا سوب و آسراتی تا کاختی آن اُلس کورونا آن کہنگ اٹی ءِ۔