سینٹ اٹی بلوچستان اسمبلی نا نشست آتا ودکی نا بابت آئینی ترمیمی بل منظور

اسلام آباد(آن لائن)ایوان بالا بلوچستان اسمبلی نا سیٹ آتا بابت آئینی ترمیمی بل کل انا سلاہ ٹی منظور کننگانے، ایوان اٹ ساڑی 71 باسک آک بل نا حق اٹ ووٹ تسر ہچ ءُ باسک اس برخلاف تے متو۔ تدوک آ دے سینیٹ اٹی سینیٹر سجاد حسین طوری،سینیٹر احمد خان،سینیٹر نصیب اللہ بازئی،نثار جمالی،منظور کاکڑ،مولانا عبدالغفور حیدری،آغا شاہزیب درانی،کلثوم پروین،سردار محمد شفیق ترین،میرکبیر احمد شاہی،عابدہ محمد عظیم،گل بشری،کبیر بابر و سینیٹر انوارالحق نا کنڈآن آئین نا آرٹیکل 106 ٹی پین ترمیم نا بل سینیٹر نصیب اللہ بازئی پیش کرے او وخت آ سینیٹر سرفراز بگٹی پارینے کہ بل انا مسخت بلوچستان نا بھلا بھلا حلقہ غاتے دوئی مروک آ ویل آتا ایسر کننگ و پد تمنگ نا ایسری کن گام گیج کننگ ءِ۔ سینیٹر جاوید عباسی پارینے کہ بلوچستان نا سینیٹرک دا ترمیم ءِ خواہسوسر کہ بلوچستان نا سیٹ آتیٹی ودکی کننگے و دا بابت اٹ بلوچستان نا کل سٹیک ہولڈر آتون سلاہ کننگانے۔ او پارینے کہ صوبائی کہول آ سیٹ آتے ودفنگ کن دا سینیٹ نا باسک آتا سلاہ اسٹ ءِ۔ او وخت آ وزیر مملکت علی محمد خان پارینے کہ دا بل انا کل سیاسی جماعت آک مکمل وڑ اٹ مخ تفی ءِ کننگ اٹی ءِ۔ او پارینے کہ اینو وخت بسنے کہ بلوچستان نا ڈکھ آتا پوروی ءِ کینہ، دا بل انا منظوری آن بلوچستان نا پد تمنگ نا ایسر ٹی کمک رسینگک۔ او وخت آ ایوان اٹ آئینی ترمیم بل آ رائے شماری کننگا و ایوان اٹ ساڑی 71 باسک آک بل انا حق اٹ ووٹ تسر و ہچ ءُ باسک اس مخالفت کتو۔