نیب سیاسی لائن نا ایپار نا بندغ آتا برخلاف ہچ ءُ گام اس ہرفپک، سپریم کورٹ

اسلام آباد ( مانیٹرنگ ڈیسک) سپریم کورٹ مسلم لیگ (ن) نا راہشون خواجہ سعد رفیق و اونا ایلم خواجہ سلمان رفیق نا ضمانت نا سرجم فیصلہ ءِ جاری کرینے، سپریم کورٹ اینخو 17 مارچ آ دا مقدمہ ٹی خواجہ سعد رفیق و سلمان رفیق نا ضمانت ءِ 30،30 لکھ روپئی نا مچلکہ غاتا ایوَز منظور کریسس، لیگی راہشون تا ضمانت نا بابت 87 پنہ نا سرجم فیصلہ اینو جاری کننگانے، ہرادے جسٹس مقبول باقر نوشتہ کرینے، سپریم کورٹ تینا فیصلہ ٹی گوندانے کہ نیب کانود ءِ لتاڑ کرینے، و کانود نا پاش آن پاش خلاف ورزی ءِ کرینے۔ کانود و آئین نا جاچ ءِ ہلنگ آن پد ہم دا ویدن اسے کہ دا مقدمہ امر جوڑ کننگا؟ فیصلہ ٹی پاننگانے کہ نیب کانود ملک اٹی گچینی نا جاگہ غا مخالف آتا دُو تے ریس تننگ کن کاریم اٹ اتنگانے، و نیب آرڈیننس تینا بنا غان جھیڑہ ئی مسنے۔ و دا ہیت ہم خننگانے کہ نیب سیاسی لائن نا ایپار نا بندغ آتا برخلاف ہچ ءُ گام اس ہرفپک۔