مچ آ ملک اٹی اینخو سال انا اولیکو 5 دے ئی انسداد پولیو مہم نا بنا

اسلام آباد (اے پی پی) مچ آ ملک اٹی اینخو نا سال انا اولیکو 5 دے ئی انسداد پولیو مہم نا بنا ءِ دوشنبے آن کننگانے۔ کورونا نا دین انا سوب آن چارتُوآن پد دوشنبے نادے 20 جولائی آن چنکو کچ اسے ٹی دُوارہ پولیو مہم نا بنا ءِ کننگانے، دا رد اٹ فیصل آباد، اٹک، سویلی وزیرستان نا ضلع غاتیان بیدس کراچی و کوئٹہ نا خاص انگا ضلع غاتیٹی پنچ سال آن کم ہشت لکھ چناتے انسداد پولیو نا پڑی کنفنگک۔ وزارت جان جوڑی آن جاری بیان نارداٹ وزارت جان جوڑی و جی پی ای آئی Polio Global Initiative Eradication نا پارت آتے مون آ تخسا پاکستان پولیو پروگرام غٹ مہم آتے پدبٹیسس و پروگرام ءِ کورونا نا دین انا گچین چاروکی نا زمواری تننگا۔ پاکستان انسداد پولیو پروگرام مچ آ پاکستان آن گچین وڑاٹ کورونا، پولیو و ایلوناجوڑی تا چاروکی ءِ کرے، لاک ڈاون، اوپی ڈی نا بند مننگ و ہن و بر نا آسراتی تا مفننگ نا سوب آن ناجوڑی تا انسداد نا مہم آک مننگ کتوس، اسہ اندازہ سے نا رداٹ ماہانہ اوسط ہفت لکھ پوسکن ودی مروک آ چناتے المی ویکسین تننگ نا رد اٹ زہمی مس، وخت اس کہ ایلو کنڈآ اُرا اُراغا ہنسا مہم زہمی مننگ آن چناتیٹی قوت مدافعت نا ویل ودی مس، دسمبر 2019ءو مارچ 2020ءاٹی سرسہب پولیو مہم آتے چلیفنگ آن پد مہم مفننگ نا سوب آن خراب ءُ زہم اس تما، ہنداخاطرآن ڈبلیو پی وی ون و ٹائپ ٹووائرس نا ودنگ نا رسک ودانے۔