گچین کاریک بایدے تینا وخت آ اکتوبر اٹ مریر، سردار رند
بایدے ساڑی حکومت تینا مُد ءِ پورو کے، اسمبلیک پک کروک آ وخت آ پرغنگر، نگران سیٹ اپ نا ہم وخت آ فیصلہ کروئی تمک
کوئٹہ : بلوچستان اسمبلی نا باسک ومسکوہی صوبائی وزیر سینئر سیاستدان سردار یار محمد رند پارینے کہ مک اٹ ہرا بے چیٹی ءِ تالان کننگ انگ ءِ داڑان خننگ انگ ءِ کہ ملک انا فائدہ وسیاست اٹ حب الوطنی اسہ جاگہ اس ہم خننگ پننگ انگ ءِ‘ اگہ ملک دشمنک دا حالیت آتے ٹی سرسہب مریرہ تو دانا مسخت دادے کہ نن ملک وقوم ءِ نسخان رسیفنگ اٹی ان‘ دن ءُ گام گیج کپن ہراڑان ملک اٹ بے چیٹی و تنکی نا وڑ ودی مرے‘ ملک مہالو آن زرگزرانی و ایلو تنکی تا گواچی ءِ ملک تینٹ تنکی ناکنڈآ ہنپک بلکہ دادے رزانا تنکی ناکنڈآ دھکہ تننگ انگ ءِ‘ و ملک انا زرگزرانی نا گچین کن گام گیج کپننگ انگ ءِ۔ اوپارے کہ بایدے ساڑی حکومت تینا وخت ءِ پورو کے و اسمبلیک پن کروک وخت آ پرغنگر و اوکان گڈ سیٹ اپ ٹہیفنگے‘ گچین کاریک آئین وکانود نارد اٹ اکتوبر اٹ اڈتننگر۔ او پارے کہ دا وخت آ گچین کاری و اسمبلی تا وخت انا بابت ہرا بے چیٹی و تنکی نا وڑ تے ودی کننگانے داڑان قوم ءِ کشنگ کن الیکشن کمیشن آف پاکستان و تعلقدار ادارہ غاتا زمواری ءِ کہ او ساڑی اسمبلی تا آئینی وخت انا پورو مننگ و وخت انا چٹنگ نا تاریخ تون اوار نگران حکومت و گچین کاری شیڈول نا پورو پڑو ءِ کیر کہ ہراتم گچین کاریک مریرہ۔ اوپارے کہ ہرا وڑ برانز نا وخت آ ملک و قوم انا قومی ملکیت جناح ہاؤس‘ کور کمانڈر ہاؤس‘ جی ایچ کیو‘ ریڈیو پاکستان پشاور و ملکی میرات آتے شست کننگا اونا مذمت ءِ کینہ دا بھلو شکی گری اسے کہ نن تینا ملک انا ملکیت و شہیدو غازی تا یاتگار تے خاخر تننگ اٹی ان ہراکہ مچ آ دنیا ٹی مخوئی مننگ ناسوب مسنے۔ ہرا وڑ جناح ہاؤس و قومی ادارہ غاتیا جلہو کرسا اوفتے خاخر تننگا اگہ دا عمل ءِ بلوچستان نا بندغ آک کاریرہ تو اوفتا برخلاف سخت کارروائی کننگاکہ۔ او پارے کہ دا ننا ملک ءِ دانا سالمیت و سوگوی کن تینا کڑد ءِ سر تروئی مریک۔
(آن لائن)