حکومت نا غریب الس کن پٹرول سبسڈی ءِ 100روپئی کننگ نا پڑو

لاہور : وزیراعظم محمد شہباز شریف موٹرسائیک، رکشہ و 800 سی سی اسکان نا گاڈی تیکن پیٹرول آ فی لیٹر 100روپئی سبسڈی تننگ نا پڑو کرسا پارت کرینے کہ کم کٹیا والا نیزگار الس کن پیٹرولیم سبسڈی ٹی موٹرسائیکل، رکشہ غان بیدس 800 سی سی تون اوار ایلو چنکا گاڈی تے کاریم اٹ اتوک آ غٹ کم کٹیا والا صارف آتے اوار کننگے، پیٹرولیم سبسڈی نا عملی پروگرام ءِ زوت آن زوت پورو کننگے، پیٹرولیم سبسڈی آ گچین عملدرآمد کن غٹ تعلقدار ادارہ غاک تین پہ تینی کمک اٹ جوان ءُ حکمت عملی اس جوڑ کیر۔ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی کم کٹیا والا پیٹرولیم صارف آتیکن پیٹرولیم ریلیف پیکج آ جاچ دیوان اس لاہور اٹی اڈ ہلک۔ دیوان اٹی کم کٹیا والا نیزگار الس کن 50 روپئی فی لیٹر اسکان پیٹرولیم ریلیف پیکج تننگک۔ وزیراعظم پارت کرے کہ پیٹرولیم سبسڈی ٹی موٹرسائیکل، رکشہ، آن بیدس 800 سی سی تون اوار ایلو چنکاگاڈی تے کاریم اٹ اتوک آ غٹ کم کٹیا والا صارف آتے اوار کننگے۔ اوپارت کرے کہ پیٹرولیم سبسڈی نا عملی پروگرام ءِ زوت آن زوت پورو کننگے و پیٹرولیم سبسڈی آ گچین عملدرآمد کن غٹ تعلقدار ادارہ غاک تین پہ تینی کمک اٹ جوان ءُ حکمت عملی اس جوڑ کیر۔ اوپارے کہ موٹرسائیکل، رکشہ و چنکا گاڈیک کم کٹیا کروک الس نا سُواریک ءُ ہنداسوب آن پیٹرولیم سبسڈی براہ راست نیزگار الس نا ریلیف نا سوب جوڑ مریک۔ اودیوان آن تران کرسا پارے کہ حکومت ترند زرگزرانی مشکل آتیان پد ہم نیزگار الس نا ہرممکن کمک کن کوشست کننگ ءِ، موٹرسائیکل رکشہ و چنکا گاڈیک کم کٹیا والا الس نا سواریک ءُ، وزیر مملتک پیٹرولیم مصدق ملک دیوان ءِ کم کٹیا بندغ اسکان پیٹرولیم سبسڈی نا فراوانی نا حکمت عملی آ حوال تس۔ دیوان اٹی بنجائی وزیر خزانہ محمد اسحاق ڈار، وزیراعظم نا سلاہکار احمد چیمہ، وزیر مملکت پیٹرولیم مصدق ملک، وزیراعظم نا خصوصی کمکار طارق باجوہ، سیکرٹری خزانہ، سیکرٹری پیٹرولیم و ایلو بڑزکو کمامدارآک بشخ ہلکر۔

(اے پی پی)