فوج انا برخلاف پیشن ملک آن سازش مننگ ءِ، وزیر اعظم
آرمی چیف نا برخلاف مہم ناقابل سگ و ادارہ غاتا برخلاف سازش نا چرجوئی اسے، پیشن نا ملک محب وطن پاکستانی فارن فنڈڈ مہم نا برخلاف توار چست کیر،وزیر داخلہ مہم چلیفوک آتتون سختی کے، شہباز شریف
اسلام آباد : وزیراعظم شہباز شریف فوج و اونا سروک نا برخلاف پیشن نا ملک غلیظ مہم نا ترندی اٹ مذمت ءِ کرسا پارینے کہ آرمی چیف نا برخلاف مہم ناقابل سگ و ادارہ غاتا برخلاف سازش نا چرجوئی اسے، پیشن نا ملک محب وطن پاکستانی فارن فنڈڈ مہم نا برخلاف توار چست کیر۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم پارے کہ پیشن نا ملک پاکستانی تا کمک اٹ زیاری سیاست ءِ تالان کننگ انگ ءِ۔ وزیراعظم پارے کہ پیشن نا ملک پاکستانیک دا سازش اٹی بشخ ہلپس، عمران خان ادارہ و اوفتا سروک آتے تینا گندی سیاست اٹ گرکرسا آئین شکنی کننگ ءِ۔ وزیراعظم پارے کہ وزیرداخلہ ملک انا تہہ ٹی ادارہ غاتا برخلاف غلیظ مہم چلیفوک آتون سختی اٹ مون ایتے۔ پاکستان اٹی ہڑدڑ، پھسات و بغاوت ءِ تہو تروک آتا برخلاف سخت کانودی کارروائی کننگے۔ میرٹ آ تعینات مروک آ آرمی چیف نا برخلاف مہم ملک دشمن تا ایجنڈا مننگ کیک۔ قوم تینا ادارہ غاتون سلوک ءِ، شرپسند آتا برخلاف متحد ءِ۔ وزیراعظم ناکماشی ٹی سیوتی راہشون تا دیوان اڈہلک‘ دیوان اٹ ملک انا جم سیاسی و زرگزرانی حالیت آتا سرجم جاچ ہلنگا‘ حکومتی راہشون تا پی ٹی آئی نا سیاسی گام گیج آتیا گڑتی درشان عمران خان نا سیاست ناوڑ ءِ تاڑواڑ گوندا۔ حوالی نا رد اٹ وزیراعظم ناکماشی ٹی اڈہلوک دیوان اٹ سیوتی راہشونک موقف تینائی کریر کہ عمران خان نا سیاست ناوڑ ملک ءِ نسخان رسیفنگ اٹی ءِ‘ عمران خان عدالت آتیان نرنگ کن کسر پٹنگ اٹی ءِ‘ ادارہ غاتا برخلاف ہیت کننگ پی ٹی آئی نا سجفوک ءُ سازش اسے۔ راہشونک فوج و آرمی چیف نا برخلاف برجا مہم اٹ بشخ ہلوک آتا برخلاف کارروائی نا سلاہ ترسا حکومتی سیوتی راہشون‘ پولیس فورس آ جلہو‘ بیدادی آ ساڑی کارروائی تیا گڑتی درشان کریر‘ حوالی نا رد اٹ سیوتی راہشونک عدالت آتا عمل نا وڑ آ ہم سوج ہرفیر‘ شریدار آک مسکوہی چیف جسٹس ثاقب نثار نا آڈیو لیک آ گڑتی درشان کرسا پاریر کہ اہم انگا منصب آ مروک بندغ نا زالبول نا بارو اٹ ہیت وگپ بھلو بے وڑی اسے‘دیوان اٹ حکومتی سیوتیک دا ہیت آ امنا کریر کہ آئین وکانود نا رد اٹ کل گام گیج آتے برجا تخنگک‘سیوتیک دا عزم انا درشانی ءِ ہم کریر کہ قوم تینا ادارہ غاتتون سلوک ءِ‘ شرپسند آتا برخلاف اسٹ ءِ۔دا وخت آ وزیراعظم تران کرسا اومیت درشان کرے کہ زوت زرگزرانی سختی تیان پیش تمنہ‘سیوتی تا اواری اٹ الس ءِ سختی تیان کشنہ۔ وزیراعظم پارے کہ غریب تپّہ ءِ آسراتی رسیفنگ کن ہر وڑ انا گام گیج کننگ اٹی ان۔او پارے کہ ملک دا وخت آ ہڑدڑ و تاڑ وڑ ءِ سگنگ کپک۔
(اے پی پی/ آن لائن)