چیئرمین نیب آفتاب سلطان نا استیفہ منظور

اسلام آباد : چیئرمین نیب آفتاب سلطان تینا عہدہ غان استیفہ تس‘ وخت اس کہ وزیراعظم شہباز شریف چیئرمین نیب آفتاب سلطان نا استیفہ ءِ منظور کرے۔ نجی ٹی وی تون ہیت وگپ کرسا چیئرمین نیب آفتاب سلطان پارے کہ ای وزیراعظم شہبازشریف تون اوڑدہی کریٹ او کن کن نیک انگا استخواہی تا درشانی ءِ کرے‘ ای ہم اوڑکن نیک انگا استخواہی تخوہ‘ ای منہ دے مست استیفہ تسٹ و کنے منہ گڑاسے نا پاننگا ہرافتے ای کننگ کتوٹہ‘ ای پاریٹ کہ شڑت آتیا کاریم ءِ برجا تخنگ کپرہ و گڑاس کنا مجبوری ہم اریر اوکان گڈ وزیراعظم کنا استیفہ ءِ منظور کرے‘ ای جوان ءُ موڑ اسے آ استیفہ تسٹ‘ ای خواہسٹہ کہ دن ءُ کاریم اس کپر ہرانا سوب آن ادارہ غا ہور ہرفنگ مرے‘ ای مدام میرٹ وکانود نا رد اٹ کاریم کریٹ۔ حوالی نا رد اٹ آفتاب سلطان کانود نا رد اٹ گڑاس کاریم کننگ خواہسکہ و اوڑا دزگیری کن زور شاغنگاسس۔ نیب ترمیمی ایکٹ انا رد اٹ چیئرمین نیب انا واکداریک کم مسر ہراڑا اونا گڑتیک ئسر و واکداری تا کمتی نا سوب آن آفتاب سلطان کس انا استخواہی آ کاریم کننگ آن نمن مسوسس۔ او خواتوکہ کہ او مسکوہی چیئرمین جاوید اقبال انا وڑ کاریم کے۔ آفتاب سلطان نا تعلقداری پولیس سروس پاکستان آن ءِ و او گریڈ 22 نا افسر سے۔ آفتاب سلطان ڈی جی آئی بی تون اوار ایلو اہم انگا عہدہ غاتیا ہم تعینات مسنے۔ آفتاب سلطان مسکوہی چیئرمین نیب جاوید اقبال نا ریٹائرمنٹ آن پد جولائی 2022 آ نیب انا کماشی ءِ دوئی کرے۔ وزیراعظم آفس آن جاری کروک اعلامیہ نا رد اٹ چیئرمین نیب تینا استیفہ ءِ وزیراعظم ءِ تسنے۔ وزیراعظم شہباز شریف چیئرمین نیب آفتاب سلطان انا کاریم نا ستاءِ کرے و اونا ایمانداری نا سفت ءِ کرے۔ اعلامیہ ٹی پاننگانے کہ چیئرمین نیب ذاتی سوب آن استیفہ تسنے، آفتاب سلطان نا زور شاغنگ آ وزیراعظم اونا استیفہ ءِ امنا کرے‘حوالی نا رد اٹ چیئرمین نیب انا تعیناتی ءِ بنجائی کابینہ کریسس و کابینہ نا منظوری آن گڈ استیفہ نا عمل پورو مریک، وزیراعظم آفتاب سلطان نا استیفہ نا منظوری ءِ بنجائی کابینہ غان ہلنگ نا موکل تسنے‘ استیفہ نا منظوری نا عمل بنجائی کابینہ نا منظوری آن پد پورو مریک۔ یات سلے کہ نیب انا کانود اٹ ترمیم نابابت سپریم کورٹ اٹ کیس انا سماعت ہم مننگ ءِ۔ داکان بیدس نیب انا پوسکن آ کانود نا رد اٹ ہرا کیس ءِ ہراڑے راہی کروءِ۔ آفتاب سلطان کیہی بیورو تے ٹی پوسکن آکانود نا رد اٹ ڈیوٹی خلکوسس۔ داکان بیدس نیب ترمیمی ایکٹ ءِ چیلنج کننگ نا اسلام آباد ہائی کورٹ بار نا درخواست آ اسلام آباد ہائی کورٹ پرمان کریسس کہ نیب ترمیم تیان پد عدالت اٹ سماعت مروک کل نیب کیس تے لارجر بینچ بنک۔

(آن لائن)