پاکستان اٹ زائر آتا کمک اٹ کورونا نا تالانی نا تاثر سہی اف، جام کمال

0

Get real time updates directly on you device, subscribe now.

کوئٹہ (خ ن) وزیراعلیٰ بلوچستان جام کمال خان تون کوئٹہ ٹی تعینات قونصل جنرل اسلامی جمہوریہ ایران محمد رفیعی یک شنبے نا دے اوڑدہی کرے۔ پاک ایران تعلقداری و ہڑتوم آ برادر اسلامی ملک آتا نیام اٹ واپاری، راجی، ربیدگی بشخ آتیٹی کمکاری ءِ شون تننگ نا بابت باندات آتیا ہیت و گپ کننگا۔ قونصل جنرل کوئٹہ ٹی گدرینگوک آ 4 سال اٹی تینا کارکڑد نا بابت وزیر اعلیٰ بلوچستان ءِ معلومدار کرے۔ قونصل جنرل بارٹر ٹریڈ ءِ عملی دروشم تننگ نا گرج آ زور شاغسا پارے کہ بارٹر ٹریڈ ڈیہہ اٹی ساڑی غریبی نا چٹفنگ اٹ کمکار مننگ کیک۔ دا وخت آ 1700 نا کچ کنٹینر ہرافتیٹی پیٹروکیمیکل گڑا، و بھلو کچ اسے ٹی کنوئی گڑا اریر۔ تفتان میر جاوہ بارڈر آ سلوک ءُ، و بارڈر کراس کننگ کن ہُروک ءُ۔ ہرافتیٹی تخوک گڑا تا خراب مننگ نا گڑتی کاٹم ہرفنگ ءِ۔ قونصل جنرل پارے کہ بلوچستان اٹی 4 سال نا وخت اٹی خڑکی و است خواہی نا اسہ تعلقداری اس بلوچستان تون ودی مسنے۔ قونصل جنرل پاکستانی مسافر تے زور اٹ بارڈر آ گدریفنگ نا سختی اٹ تردید کرینے، ہرافتیٹی زائر، پوریاگر، طالب علم آتا بھلو کچ اس اوار ءِ۔ او پارے کہ ایرانی حکومت صدر حسن روحانی نا پارت نا رد اٹ غٹ مسافر تے المی اسکریننگ پروسیس آن گدریفسا ہیلتھ سرٹیفکیٹ جاری کرینے تاکہ اگہ خدا کپ پاکستانی مسافر اسے کرونا مریک تو اودے ایران نا تہٹی مفت درمان نا آسراتی تننگے۔ قونصل جنرل وزیر اعلیٰ بلوچستان نا گام گیج آتا ستا ءِ کرے، ہرافتیٹی صوبائی حکومت نا کنڈ آن بھاز زُو گونڈ ءُ وخت اسے ٹی ایران آن پدی بروک آ غٹ مسافر تے کن تفتان بارڈر آ کورنٹائن و ایلو آسراتی تا فراوانی اوار ءِ۔ وزیر اعلیٰ بلوچستان ایرانی قونصل جنرل نا خذمت آتا ستا ءِ کرسا اومیت درشان کرے کہ ہڑتوم آ ملک آتا نیام اٹ تعلقداری تے پین سوگو کننگ کن او ایران نا تہٹی ہم تینا کوشست آتے برجا تخک۔ وزیراعلیٰ کورونا وائرس آن ودی مروک حالیت نا رد اٹ ایران اٹی مروک جانی نسخان تیا است ہسونی درشان کرے۔ وزیر اعلیٰ بلوچستان پارے کہ پاکستان اٹی کورونا وائرس نا تالانی نا بابت اسہ غلط ءُ تاثر اس تننگا کہ دا وائرس زائر آتیان ایران آن تفتان نا کسر اٹ ملک اٹ پترینگانے، دا بابت الس ءِ وضاحت پیش کننگ نا گرج مس، ہراکان پد دا تاثر بھلو کچ اس اسکان شیف تمانے۔ نن ایمرجنسی بنداو آ ایران آن پدی بروک غٹ مسافر و زائر آتے تفتان و کوئٹہ ٹی کیہی دے اسکان کورنٹائن اٹی تخان، و زائر آتے اوفتا صوبہ غاتیا راہی کرین۔ صوبائی حکومت تفتان اٹی زائر آتے کن آخبتی بنداو آ آسراتی ٹہیفنگ اٹی ءِ۔ وزیراعلیٰ پارے کہ او وزیر اعظم عمران خان و بنجائی وزیر اسد عمر تون تفتان بارڈر آ واپاری پالیسی و انفراسٹرکچر نا بابت سرجم ہیت و گپ کرینے۔ و آسراتی تا جاچ ءِ ہلنگ کن ای تینٹ ہم تفتان بارڈر نا دورہ ءِ کرینے۔ وزیر اعلیٰ بلوچستان قونصل جنرل کن نیک است خواہی تا درشانی کرسا پارے کہ کورونا وائرس نا دین انا چٹنگ آن پد ہڑتوم آ ملک آتا تعلقداری تے غٹ بشخ آتے اسہ پوسکن ءُ گیری اس رسینگک۔

Get real time updates directly on you device, subscribe now.

Leave A Reply

Your email address will not be published.