بلوچستان اٹ لاک ڈاﺅن سرسہب مس ،منہ بشخ اسے موکل تننگانے، محسن بٹ

کوئٹہ (آن لائن) انسپکٹر جنرل پولیس آف بلوچستان محسن حسن بٹ پارینے کہ بلوچستان اٹ لاک ڈاﺅن سرسہب مس ولے حکومت ناکنڈآن مچٹ نرمی کرسا کشاری و تعمیراتی ڈٹ آتون گنڈوک پوریاءِ ملنگ نا موکل تننگانے‘ بلوچستان آن ملک انا بشخ آتیا ہنوک زائر آتون اوار ایلوبندغ آتے 14دے کورنٹائن و اسکریننگ آن پد راہی کننگا‘ ہراکان گڈ اوفتا باوہ پیرہ ئی آعالاقہ غاتے ٹی سر مننگ آ ہمو جاگہ نا انتظامیہ ءِ دوارہ اسکریننگ نا بابت معلومدار کننگاسس‘ بلوچستان پولیس اٹ داسکان کورونا نا زہمی اف‘ دفعہ 144 نا خلاف ورزی آ ہلنگوک بندغ آتے وارننگ ترسا یلہ کننگانے۔ دا خیال آتا درشانی ءِ او نجی ٹی وی چینل تون ہیت وگپ کرسا کرے۔ او پارے کہ بلوچستان پولیس ساڑی مشکل حالیت اٹ فرنٹ لائن آ مرسا الس ءِ کورونا غان بچفنگ و رکھی گام گیج آتا بابت پبی کوشست کننگ اٹی ءِ۔ بلوچستان اٹ لاک ڈاﺅن نا بابت ہم پولیس کارندہ‘ افسر آک جوان خواری کننگ ءُ‘ دفعہ 144 نا خلاف ورزی آ دونیم ہزار آن زیات بندغ آتا برخلاف کارروائی کننگا ہراکان گڈ وارننگ ترسا غٹ بندغ آتے یلہ کننگا‘ لاک ڈاﺅن اٹ الس نا کمک اٹ پولیس تینا کڑد ءِ ادا کننگ اٹی ءِ‘ مچ مروک آ ہند آتیا ہم پولیس الس ءِ اُراتے ٹی سلفنگ نا پبی کوشست کننگ اٹی ءِ‘ الس ساڑی حالیت آتے ٹی پولیس تون کمک کرسا کورونا ءِ بے سہب کننگ کن تینا کڑد ءِ ادا کے تاکہ کورونا کون آ ناجوڑی آن بچفنگ مرے۔ او پارے کہ محکمہ پی ڈی ایم اے، فلاحی تنظیم و پولیس نا تینا کنڈآن کارندہ غاتے ماسک وگلو‘ سینیٹائز بھلو کچ اسے ٹی فراوان کننگا و کارندہ غاتے پارت کننگا کہ کورونا غان بچنگ نا غٹ رکھی گام گیج آتے تینائی کرسا ڈیوٹی کیر۔