منی پیٹرول پمپ جوڑ مننگ آن آبادی ءِ گڑتیک پلویڑ کننگ ءُ، صادق عمرانی

تمبو (آن لائن) پیپلزپارٹی نا سینٹرل ایگزیکٹوکمیٹی نا باسک و مسکوہی صوبائی وزیر میرمحمد صادق عمرانی پارینے کہ ڈیرہ مرادجمالی شار انا نیام اٹ غیرکانودی منی پیٹرول پمپ جوڑ مننگ آن آبادی ءِ گڑتیک پلویڑ کرینو‘ کمشنر نصیرآباد وڈی آئی جی نصیرآباد نا ایس ایس پی نصیرآباد ءِ پیدوار پارت آتیان پد ہم داڑا ہچ عملدآمد مفننگ ءِ۔ دا خیال آتادرشانی ءِ او صحافی تتون ہیت وگپ کرسا کرے۔ میرمحمدصادق عمرانی پارے کہ صوبائی حکومت بلوچستان ءِ پین پسماندگی نا گواچی کرینے‘ صوبہ نا سرکاری ہسپتال آتے ٹی غریب الس کن کاٹم خل/ نا گولی اسکان اف و او کورونا ءِ توننگ نا دعویٰ کننگ اٹی ءِ۔ اوپارے کہ صوبہ ٹی کورونا وائرس تون مون تننگ کن صوبائی حکومت ہچ گام گیج کتنے و ایران آن بروک زائر آتے ہندن کوئٹہ ٹی النگ وائرس ءِ سلہ خلنگ آنبار ءِ۔ او پارے کہ کوئٹہ تون اوار ایلو ضلع غاتا کرنٹائن وآئسولیشن سینٹر آتے ٹی ڈاکٹر و وائرس نا زہمی تے آسراتی رسیفپننگ صوبائی حکومت نا نابودی ءِ پک کیک۔