ضلعی انتظامیہ نا زائرآتتون اواری اٹ باقاعدہ ءُ پوریا اس جوڑ مسنے،میر ثناءجمالدینی

نوشکے(تلار حوالکار)بلوچستان نیشنل پارٹی نا مسکوہی ضلعی جنرل سیکرٹری میرثناءاللہ جمالدینی ضلعی انتظامیہ نا کرونا نا بابت کارکڑد آتنقیدکرسا پارینے کہ ضلعی انتظامیہ نا زائرآتتون اواری اٹ باقاعدہ ءُ پوریا اس جوڑ مسنے۔ زائر آک ہر وڑ انا گاڈی دُنکہ بس‘ ٹوڈی کار وایلو وڑ وڈول اٹ ناکہ و کسر تیان پیسہ ترسا ہن وبر کننگ اٹی ءُ۔ دا بابت ضلعی انتظامیہ نا کارکڑد صفر مسنے۔ او پارے کہ اسہ سازش اسے نا رد اٹ صوبائی حکومت‘ ضلعی انتظامیہ نوشکے و چاغی انتظامیہ غا زور شاغسا زئر آتے تفتان آن کوئٹہ اسکان چندی ہند آتیا سڑک نا خڑک انا ہوٹل آتے ٹی دڑفسا آجوئی اٹ پیری کننگ نا موکل تننگ انگ ءِ ہراناسوب آن کرونا وائرس بلوچستان اٹ اسہ خطرناک ءُ دَین اسے ٹی بدل مسنے و ہڑدے کرونا غان زہمی مروک ناجوڑ آتا کچ ودنگ اٹی ءِ۔ او پارے کہ تفتان اٹ کروناءِ توننگ نا جاگہ غا تفتان ءِ کرونانا نرسری جوڑ کننگا ہرانا سوب آن اینو بلوچستان نا الس مشکل آتا گواچی ءِ۔ او پارے کہ اگہ ضلعی انتظامیہ تینا رویہ ءِ بدل کتو تو السی کہول آ آر سی ڈی شاہراہ ءِ بے مُد وخت اکن بند کرسا دھرنا تننگ آبیوس مرینہ۔