”جیل بھروتحریک“ جندی سیاسی مسخت کن ءِ، سینیٹر شیری رحمان

اسلام آباد: بنجائی وزیر چاگڑدی بدلی سینیٹر شیری رحمان پارینے کہ عمران خان نا ”جیل بھروتحریک“ اونا جند انا سیاسی مسخت آتیکن ءِ، دا مہم نا جمہوریت، ملک و الس تون ہچ کاریم اف‘الس آن پد پی ٹی آئی کارندہ غاک ہم اونا سیاست ءِ مسترد کرینو۔ دوشنبے نادیآ تینا اسہ ٹویٹ اسے ٹی اوپاریکہ عمران خان اینو آن جیل بھرو تحریک نا بناءِ کرسا تینٹ رکھی ضمانت کن عدالت سرمننگ ءِ، تینٹ ضمانت ہلسا کارندہ غاتے جیل آ ہِننگ نا مشورہ تننگ ءِ، ہندا سوب ءِ تحریک انصاف نا بیرہ 16 سد ورکرآک رجسٹریشن کرفینو۔ اوپاریکہ الس آن پد پی ٹی آئی کارندہ غاک ہم عمران خان نا سیاست ءِ مسترد کرینو، ہڑدے ئی منہ ورکرآتا دزگیری نا تحریک بحالی جمہوریت (ایم آرڈی) تون موازنہءِ کننگ انگ ءِ۔ شیری رحمان پارے کہ تحریک انصاف ملک اٹی جمہوریت نا جہد آن اسُل ناواقف ءِ، ایم آر ڈی ٹی سد آ مخلوق و کارندہ غاک شہید مسر، ہزار آتے زندان تیٹی شاغنگاسس، دابارواٹ پی ٹی آئی نا لاعلمی آ افسوز ہی کننگ مریک۔ اوپارے کہ ایم آرڈی تحریک ضیاء نا آمریت نا برخلاف و جمہوریت و آئین نا بحالی نا خاطر ئسک کس اسے نا ذاتی سیاست ءِ بچفنگ یا کس اسے نا بیانیہ کن الوکہ۔ شیری رحمان پارے کہ عمران خان نا ”جیل بھرو تحریک“ اونا جند انا سیاسی مسخت آتیکن ءِ، دا مہم نا جمہوریت، ملک و الس تون ہچ کاریم اف۔

(اے پی پی)