نابود حکومت ملک ءِ بھس کرینے، پی ڈی ایم

ہرکس کہ آئین ءِ معطل کرے او سزائے موت نا حقدار ءِ،محمود اچکزئی۔بے گوا بندغ آتا پدی اتنگے،ڈاکٹر عبدالمالک بلوچ۔نن سوغند نا رند ءِ دروک آ فوجی تے سلام کینہ،،الس نا وونٹ ءِ لتاڑ کروک آتے سلام کپنہ،مریم نواز

نن مدام جمہوریت کن جہد کرینن، بلاول بھٹو زرداری۔پی ڈی ایم نا جلسہ ٹی تولوک دا بندغ آک پاکستان کن جنگ کننگ اٹی ءُ، ننے ہر وڑ اٹ خڑک کننگ نا کوشست کننگا، مولانا فضل الرحمن،پی ڈی ایم جلسہ غان تران

کراچی : مولانا فضل الرحمن پارینے کہ پی ڈی ایم نا جلسہ ٹی تولوک دا بندغ آک پاکستان کن جنگ کننگ اٹی ءُ، ملک اکن جنگ کننگ اٹی ءُ، ملک انا آئین کن جنگ کننگ اٹی ءُ۔ جلسہ غان تران کرسا او پارے کہ ننے ہر وڑ اٹ خڑک کننگ نا کوشست کننگا، ولے ننے الس و ملک انا آخبت دوست ءِ۔ بلاول بھٹو زرداری پارے کہ شہید بی بی ہچ خلتنے، الس ءِ ہچ تنیا الیتنے۔ نن مدام جمہوریت کن جہد کرینن، تانکہ دا سلیکٹڈ حکومت ءِ اینک کتنن، آسرات تولپنہ۔ نن جمہوریت و ملک انا بقاء کن دتر تسنن۔ پاکستان نا کل جمہوری واکدار آک جمہوریت نا بحالی کن جہد ءِ برجا تخرہ۔ مریم نواز پارینے کہ نن سوغند نا رند ءِ دروک آ فوجی تے سلام کینہ، ولے ہرافک الس نا وونٹ ءِ نت تیٹ لتاڑ کیرہ، اوفتے سلام کپنہ۔ پاکستان مسلم لیگ نواز نا نائب صدر مریم نواز کراچی ٹی پی ڈی ایم نا جلسہ غان تران نا وخت آ وزیراعظم عمران خان آ بھاز تنقید کرے۔ او اونا تدوک آ دے انا تران نا ہیت ءِ کرسا پارے کہ داسکان تو اسہ جلسہ اس مسنے کہ ’چرت خلپیرے‘ پاروک آ تینا ہوش ءِ گوہانے۔ او وزیراعظم ناپن اٹ تینا کلہو اٹ پارے کہ ننے سما ءِ کہ نے آ دباؤ ارے، ولے اگہ نے سما اف کہ دباؤ و پریشر اٹی شرفمندی ءِ امر رکھنگ مریک، تو تینا سنگت آتیان سلاہ ہل/۔ مریم نواز پارے کہ نواز شریف ہراتم وزیراعظم ئس تو نی ٹی وی آ جلہو کریس، نے یات مرو کہ او نا پن ءِ ہم ہلتوکہ۔ مریم نواز پارے کہ فوج ننا ءِ، اؤ نواز شریف داخس کرینے کہ او کڑدار و ادارہ غاتا نیام اٹ پرخ ءِ پیدوار کرینے، او پارے کہ نن تینا شہید، تینا جان تے ندر کروک آتے سلام پیش کینہ، مریم نواز پارے کہ نواز شریف پاہک کہ ’سیاست اٹی نیام تمنگ ءِ بس کبو۔ تو گڑا دا غلط ءُ ہیت اسے؟دا وخت آ پشتونخوا ملی عوامی پارٹی نا سروک محمود خان اچکزئی پارینے کہ ہرکس کہ آئین ءِ معطل کرے او سزائے موت نا حقدار ءِ۔ دا ہیت آتے او کراچی ٹی پی ڈی ایم نا جلسہ غان تران کرسا کرے۔ محمود خان اچکزئی پارے کہ پاکستان ءِ ننے کس خیرات اٹی تتنے، دا غٹ ملک اٹ رہینگوک آتا ءِ۔ او پارے کہ پی ڈی ایم پاکستان نا اول سر ٹہیفنگ نا خواہندار ءِ۔ الس نا واکداری اٹ پاکستان اٹی وونٹ انا شرف ءِ بحال کننگے۔او تینا تران اٹی بلوچستان، وزیرستان و سوات اٹی حالیت آتا خرابی نا ہم ہیت ءِ کرے۔نیشنل پارٹی نا سروک ڈاکٹر عبدالمالک بلوچ پارینے کہ بے گوا بندغ آتا پدی اتنگے۔ پی ڈی ایم نا جلسہ غان تران کرسا او پارے کہ پنجاب نا یونیورسٹی تیٹی بلوچ طالب علم آتا کوٹہ ءِ چٹفنگانے۔ ہرانا سوب آن ننا ورناک لانگ مارچ کننگ اٹی ءُ۔ او پارے کہ بلوچ طالب علم آتتون دا بھلا بے انصافی شرم انا ہیت اسے۔