ہراتم غدار پاننگنہ تو ننا تینا الس تون وفاداری پک مریک،اختر مینگل

کراچی : بلوچستان نیشنل پارٹی نا سروک سردار اختر مینگل پارے کہ ہراتم غدار پاننگنہ تو ننا تینا الس تون وفاداری پک مریک۔ نن تو ہفتاد سال آن غدار اُن، نمے داسہ غدار مننگ آ مبارکبادی ایتوہ، و تینا پڑک اٹ بننگ آ بخیر اٹ پاوہ۔ کراچی آن پد ملتان، کوئٹہ و ایلو جلسہ غاتیان پد سما دیر دیر غدار گوندنگور۔ داڑے گو گودی فاطمہ جناح ءِ ہم غدار پاننگاسس۔ او پارے کہ 25 اکتوبر آ کوئٹہ ٹی غٹ سرکڑدہ غاتے بخیر اٹ پاوہ۔ دا ملک اٹی بیرہ آئین پڑگوک آک آجو ءُ۔ او پارے کہ ’ٹریفک سگنل پرغنگ آ تو ڈنڈ مریک، ملک اٹی کیہی وار آئین ءِ پرغار، ولے اوفتا پن آ اسہ چنکو کاغد نا ٹکر اس ہم کاٹ کننگتنے۔ ’ایوب، مشرف ءِ غازی پاننگک، ولے نن ہرافک کہ دتر تسنن، ننے غدار پاننگ انگ ءِ۔ دا ہیت آتے او پی ڈی ایم نا جلسہ غان تران کرسا کرے۔ ا وپارے کہ دا ملک ءِ ملک اٹ رہینگوک آ الس کن جوڑ کننگاسس یا کنٹونمنٹ کن جوڑ کننگاسس، یا پیزا والا تے کن جوڑ کننگاسس۔ او پارے کہ نن بلوچستان نا کرک ءِ بچفنگ نا کوشست کرینہ، داسہ تو ننا جزیرہ غاتیا ہم کوزہ نا کوشست مننگ اٹی ءِ۔ نم داسہ کوزہ گیر جوڑ مسنرے۔ کرک چنک مرے یا بھلن اوڑا کوزہ نا موکل تفنہ۔او پارے کہ ’گوادر نا ماہی گیر بے روزگاری نا حالیت دادے کہ او سمندر اٹی میجر صاحب نا پرچی آن بیدس ہننگ کپسہ۔ دا ننا سمندر و ننا کرک ءِ۔ دادے نن پرتگالی تتون جنگ کجرسا بچفیسن۔ اینو حالیت دادے کہ ننا نسل کشی بنا کننگانے۔ او پارے کہ بلوچستان دا ڈیہہ اٹی ہمو بد بخت انگا علاقہ ءِ ہراڑے اینو ہم اجتماعی قبر رسینگ انگ ءِ۔ دا ہمو علاقہ ءِ ہراٹی کراچی یونیورسٹی نا طالب علم نا دو تے ایف سی نا کارندہ غاک تفرہ و اودے اونا لمہ نا مون آ سم تا گواچی کیرہ۔ دا وڑ انگا ظلم آتے نم کشمیر و فلسطین اٹ خنورے یا بنورے، ولے ای نمے بلوچستان نا پاننگ اُٹ۔ ننا ایڑھ لمہ غٓتے سما تمک کہ ہسپتال اٹی مسخ مروک ءُ لاش اس اتنگانے، اوفک اوڑے کارہ تو پچ آتیان لاش ءِ درست کیرہ۔ دادے نما اسلامی پاکستان۔۔۔۔ سگ انا ہم اسہ کچ اس مریک۔ اختر مینگل پارے کہ نن جمہوریت نا مخ تفی ءِ کینہ، ای ہمو جمہوریت آ باور کیوہ ہراڑے کنا کنے دا تو سما مرے کہ کنا ایڑھ لمہ غاتا شرف رکھوک ءِ۔ کنا ورنا تا جشوک آ لاشک بٹنگپسہ۔ ہراڑے کنے سما مرے کہ کنا بزرگ آتا دستارک چغل تننگپسہ۔