روز لیویل‘ مانچسٹر سٹی فٹبال ورلڈ کپ ءِ کٹفوک آ گوازی گر تون معاہدہ کرے

مانچسٹر (مانیٹرنگ ڈیسک) پنی آ فٹبال کلب مانچسٹر سٹی ورلڈ کپ اٹ امریکہ نا سرسہبی ءِ ممکن جوڑ کروک آ نیاڑی گوازی گر روز لیویل تون معاہدہ کرینے۔ تینا معاہدہ نا بارواٹ ہیت کرسا روز لیویل پارینے کہ چیمپئنز لیگ گوازی کروک و زیات اعزاز دوئی کننگ نا جوزہ اودے مانچسٹر سٹی نا کنڈآن گوازی پیش کننگ نا فیصلہ غا مجبور کرے۔ روز لیویل پارینے کہ دا فیصلہ کنکن بھاز چیلجنگ اسے۔ ویمن سپر لیگ اسہ بھاز بھلو ایونٹ ءِ ہرانا پنی مننگ اٹ ہر سال ودکی ہُننگ اٹ بننگ اٹی ءِ۔ دا سوب آن کنتون اوار ایلو گوازی گرک دانا کنڈ آ سجفنگ اٹی ءُُ۔ یات سلے کہ روز لیویل دا وخت اسکان تینا ملک امریکہ نا 45 وار نمائندگی ءِ کرینے۔ اودے 2019ء ورلڈ کپ ٹی بھاز گچین کارکڑد نشان تننگ آ مسٹمیکو جوان انگا گوازی گر نا اعزاز تسنے۔ خدو فرانس اٹ اڈ ہلوک آ نیاڑی تا فٹبال ورلڈ کپ نا فائنل اٹ امریکہ نیدرلینڈ ءِ 0-2 گول اٹ بے سہب کرینے۔ دفاعی چیمپئن نیدرلینڈ ءِ میچ نا اولیکو گھنٹہ ٹی ویل آتون مون تروئی تما۔ اوکان پد امریکی گوازی گر راپینو پینالٹی ٹی گول کرسا تینا ٹیم ءِ میچ اٹ سرسہبی تس۔ نیدرلینڈ نا گوازی گر وین وینین ڈال نا ردی آن امریکہ ءِ پنالٹی کارنر نا وارخواہی رسینگا ہرانا راپینول جوان فائدہ ہرفسا گول کرے۔ اوکان پد میچ نا 69 میکو منٹ آ روز لیویل اسہ پین گول اس کرسا نیدرلینڈ کن پین سختی مون تسوسُس۔