چاچا شکاگو نا ایم ایس دھونی نا ریٹائرمنٹ آن پد کرکٹ میچ آتے سیل کپننگ نا پڑو

دبئی (مانیٹرنگ ڈیسک) پاکستانی نژاد محمد بشیر بوزئی المعروف چاچا شکاگو مسکوہی بھارتی کیپٹن ایم ایس دھونی نا ریٹائرمنٹ آن پد کرکٹ گوازی کپننگ نا پڑو کرے۔ 65 سال نا بشیر بوزئی المعروف چاچا شکاگو کراچی ٹی ودی مس ولے او کیہی دہائی تیان شکاگو ٹی رہنگ انگ ءِ۔ چاچا شکاگو کرکٹ فین اس تو ارے ولے کل آن زیات فین ایم ایس دھونی نا ءِ، ایم ایس دھونی نا فین مننگ نا سوب آن پاکستان انڈیا میچ نا وخت آ اودے سخت تنقید تون ہم مون تروئی تما۔ چاچا شکاگو ایم ایس دھونی نا میچ آتے ہُننگ کن انڈیا، انگلینڈ و بنگلا دیش آ کاہک، دھونی ءِ ہم تینا شیدائی نا اندازہ ئس ہندا سوب آن نہ بیرہ اوڑتون فوٹو ہلفیکہ وخت اس کہ ٹیم مینیجر نا کمک اٹ اودے ٹکٹ ہم راہی کرفیکہ۔ 2011 ٹی آئی سی سی کرکٹ ورلڈکپ نا پاک بھارت موہالی سیمی فائنل نا وخت آ چاچا شکاگو نا اولیکو وار دھونی تون اوڑدہی ہم مس او دھونی اودے میچ انا ٹکٹ اس ہم راہی کرفے۔ ہندن 2014 آئی سی سی ٹی ٹوئنٹی ورلڈکپ ڈھاکا ٹی ہم دھونی ٹیم مینیجر آتے ٹکٹ ترسا میر پور نا ہوٹل اٹ چاچا شکاگو کن راہی کرفے۔ چاچا شکاگو ٹریننگ آن پدی بننگ آ دھونی کن نعرہ خلککہ او دھونی سلیسکہ اونا ورندی ءِ تسکہ او وارخواہی رسینگ انگ آ فوٹو ہم ہلفیکہ۔ داسہ ایم ایس دھونی نا ریٹائر مننگ آ چاچا شکاگو فریشان ءِ او پاہک کہ داسہ او کرکٹ ہرپک، کرکٹ اٹ مالو نا رونق آک سلتوس۔ او پارینے کہ کنا داسہ ہم ہندا اُست خواہی ءِ کہ ای رانچی آ اوڑتون ملنگ کن المی کاوہ اودے سیلوٹ اس کیوہ۔