پشاور اٹ پی ایس ایل میچ آک‘ بورڈ انا انسپکشن ٹیم پگہ وینیو نا جاچ ءِ ہلیک

پشاور (مانیٹرنگ ڈیسک) ای پاکستان سپر لیگ (پی ایس ایل) نا ششمیکو ایڈیشن نا میچ نا اڈ تننگ کن پاکستان کرکٹ بورڈ نا انسپکشن ٹیم پگہ وینیو نا جاچ ءِ ہلیک۔ پی ایس ایل 5 نا میچ آتے اولیکو وار پاکستان نا چار ہند آتیا سرسہبی ٹی اڈ ہلکر، داکان مست لاہور و کراچی ٹی میچ مرسا کیرہ۔ مالو پشاور ٹی ہم پی ایس ایل نا میچ آتا اڈ تننگ نا خواست کرسا کیرہ ہراڑا چیئرمین پی سی بی احسان مانی بروک آ سیزن اٹ سپرلیگ نا میچ آک پشاور ٹی ہم کننگ نا پڑو کرے۔ پشاور اٹ پی ایس ایل میچ نا اڈ تننگ نا بابت کرکٹ بورڈ نا چیئرمین نا پڑو ءِ پورو کننگ کن تیاریک ترند مسنو۔ حوال نا رداٹ پاکستان کرکٹ بورڈ نا انسپکشن ٹیم تدوک آ دے حیات آباد اسپورٹس کمپلیکس نا جاچ ءِ ہلیک ہراٹی بورڈ نا کل بشخ آتا نمائندہ اوار ءِ۔ حوال نا رداٹ کہ انسپیکشن ٹیم ٹی انٹرنیشنل کرکٹ بشخ انا کماش ذاکر خان، ڈومیسٹک کرکٹ نا بشخ انا جنرل منیجر جنید ضیاء نا بیدس پی ایس ایل، مارکیٹنگ، میڈیا، لاجسٹک و انفرا اسٹرکچر ڈپارٹمنٹ نا نمائندہ غاک اوار ءُُ۔ انسپکشن ٹیم اٹ اوار کل باسک وینیو نا جاچ ءِ ہلنگ آن پد تینا تینا بشخ آتا بابت ویل آتا سفارش ءِ جور کیک اوکان پد پی ایس ایل میچ آتا اڈ تننگ نا بابت اہم ءُُ پیشرفت گمان ارے۔ داکان مست پی سی بی نا اسہ ڈل اس تدوک آ تو اٹ ارباب نیاز اسٹیڈیم نا دورہ ءِ کرینے ہراڑے ڈل برجاانگا شونداری کاریم تا بابت اپڈیٹ فراہم کریسُس۔ پی سی بی پاکستان سپر لیگ 2021 نا منہ میچ آتے پشاور ٹی کرفنگ نا پڑو کرینے۔