پاکستان و انگلینڈ نا نیام اٹ مروک آ ارٹمیکو ٹیسٹ ڈرا مس

ساؤتھمپٹن(مانیٹرنگ ڈیسک) پاکستان و انگلینڈ نا نیام اٹ ارٹمیکو ٹیسٹ ڈرا مس۔ ساؤتھمپٹن اٹ مروک آ ارٹمیکو ٹیسٹ پِر آن زہمی مس و 5 دے اٹ ہڑتوم آ ٹیم تا اولیکو ڈائیک پورو متوس۔ اولیکو و ارٹمیکو دے ہم پر انا سوب آن میچ زہمی مسوسُس وخت اس کہ مسٹمیکو دے آ اسہ بال اس ہم خسنگ کننگ کتوس او چارمیکو دے آ پِر انا سوب آن بیرہ 10.2 اوور نا گوازی مسوسُس۔ ٹیسٹ نا پنچمیکو دے ہم گوازی پر انا سوب آن اُرے آ بنا مس و 38 اوور مننگ کریر۔ پنچمیکو دے آ انگلینڈ اسہ وکٹ نا نسخان آ 7 رنز اٹ ڈائی ءِ بنا کرے و گوازی نا ایسری آ 4 وکٹ نا نسخان آ 110 رنز جوڑ کریر۔ پاکستان نا کنڈآن محمد عباس 2، شاہین شاہ و یاسر شاہ اسک اسہ اسہ وکٹ دوئی کریر۔ داکان مست پاکستانی ٹیم اولیکو ڈائی ٹی محمد رضوان و عابد علی نا گچین ءُُ بیٹنگ اسے نا سوب آن 236 رنز جوڑ کننگ کریر۔ محمد رضوان 72، عابد علی 60 و بابر اعظم 47 رنز جوڑ کننگ اٹ سرسہب مسر وخت اس کہ محمد رضوان ءِ مین آف دی میچ پن کریر۔ میچ ڈرا مننگ نا وڑ اٹ ہڑتوم آ ٹیم تے13، 13 پوائنٹ تننگا وخت اس کہ 3 ٹیسٹ نا سیریز اٹ مہماندار انگلینڈ 0-1 ٹی مونی ءِ۔