بابر اعظم ہر مسٹ انگا فارمیٹ آتیٹی ٹاپ 5 آ ساڑی دنیا نا اسٹ انگا گوازی گر

دبئی (مانیٹرنگ ڈیسک) پاکستان ون ڈے ٹیم نا کیپٹن بابر اعظم دنیا نا اسٹ انگا گوازی گر ءِ ہرا بیک وقت ہر مسٹ انگا وڑ انا کرکٹ اٹ ٹاپ 5 گوازی گر تے ٹی اوار ءِ۔ انٹرنیشنل کرکٹ کونسل (آئی سی سی) پاکستان و انگلینڈ نا نیام اٹ ٹیسٹ میچ ڈرا مننگ آن پد تازہ انگا رینکنگ ءِ جاری کرے۔ ٹیسٹ پلیئرز رینکنگ اٹ پاکستانی کرکٹر تا درجہ بندی ٹی جوانی بسنے، بیٹنگ اٹ بابراعظم نا کیریئر بیسٹ پنچمیکو پوزیشن آ پدی بسنے وخت اس کہ باولنگ اٹ محمد عباس ارا گام جوانی آن پد ہشتمیکو پوزیشن آ بسنے۔ آئی سی سی نا رداٹ پاکستان ون ڈے ٹیم نا کیپٹن بابر اعظم دنیا نا اسٹ انگا گوازی گر ءِ ہرا بیک وقت ہر مسٹ انگا وڑ نا کرکٹ اٹ ٹاپ 5 گوازی گر تیٹی اوار ءِ۔ بابر اعظم ٹیسٹ اٹ 5 میکو، ون ڈے ٹی مسٹمیکو و ٹی ٹوئنٹی ٹی اولیکو نمبر آٹے۔ ٹیسٹ بیٹسمین تا رینکنگ اٹ اولیکو نمبر آ آسٹریلیا نا اسٹیو اسمتھ، ارٹمیکو نمبر آ بھارت نا ویرات کوہلی وخت اس کہ مسٹمیکو نمبر آ آسٹریلیا نا مارنوس لبوشانجے ساڑی ءِ۔ باولر تیا نظر شاغنگے تو پاکستان نا محمد عباس دہ میکو نمبر آ ہشتمیکو نمبر آ بسنے۔ آسٹریلیا نا پیٹ کمنز اولیکو نمبر آ ساڑی ءِ۔ ارٹمیکو نمبر آ انگلش فاسٹ باولر اسٹیورٹ براڈ وخت اس کہ مسٹمیکو نمبر آ آسٹریلیا نا نیل ویگنر ساڑی ءِ۔ آئی سی سی ورلڈ ٹیسٹ چمپئن شپ اٹ پاکستان 153 پوائنٹ تون پنچمیکو نمبرآٹے وخت اس کہ انگلینڈ مسٹمیکو نمبر آٹے۔