ایم ایل ون آن راجی و زرگزرانی شونداری نا پوسکن ءُ دور اس بناکیک، عمران خان

اسلام آباد (اے پی پی) وزیراعظم عمران خان پارینے کہ ایم ایل ون ڈٹ سی پیک نا غٹ آن اہم و بنجائی ڈٹ ءِ ، ایم ایل ون ڈٹ آن راجی و زرگزرانی شونداری نا پوسکن ءُ دور اس بناکیک، ایم ایل ون ڈٹ آن الس ءِ سفر و مال برداری نا گچین آسراتی دُوبریک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او تینا کماشی ٹی ایم ایل ون (مین لین ون) ڈٹ انا بابت دیوان آن تران کرسا کرے۔ دیوان اٹی ایم ایل ون (مین لین ون) ڈٹ انا بابت حوال تننگا۔ دیوان اٹی وزیر ریلوائی شیخ رشید احمد، وزیر ڈٹ بندی اسدعمر، سلاہکار خزانہ ڈاکٹر عبدالحفیظ شیخ، چیئرمین سی پیک اتھارٹی و خصوصی کمکار لیفٹیننٹ جنرل (ر) عاصم سلیم باجوہ و سینئر آفیسر آک ساڑی ئسر۔ وزیراعظم ءِ ایم ایل ون ڈٹ، پروجیکٹ آ عملدرآمد نا بابت تخوک آ ٹائم لائنز، داتم اسکان مروک آ پیش رفت و ڈٹ انا بھرم تیاسرجم حوال تننگا۔ دیوان اٹی وزیراعظم عمران خان پارے کہ ایم ایل ون ڈٹ سی پیک نا غٹ آن اہم و بنجائی ڈٹ ءِ۔ ایم ایل ون ڈٹ آن نئے بیرہ ریلوائی نا نظام پوسکن و سوگو مریک بلکن دا ڈٹ آن کسبکار و ہیلاک بندغ آتیکن نوکری تا ہزار آ وارخواہی ودی مریک و صنعتی عمل ءِ مون آ دننگک۔