این ڈی ایم اے نا ملک انا بھلا ہوٹل آتے کرنٹائن سنٹر اٹ بدل کننگ نا سلاہ

اسلام آباد(آن لائن) نیشنل ڈیزاسٹر مینجمنٹ اتھارٹی( این ڈی ایم اے) کرونا وائرس نا ودوک آ کیس آتا سوب آن ملک انا بھلا بھلا ہوٹل آتے کرنٹائن سینٹر اٹ بدل کننگ نا سلاہ تننگا۔ نیشنل ڈیزاسٹر مینجمنٹ اتھارٹی ملک اٹ بھلا بھلا ہوٹل آتے کرنٹائن سینٹر اٹ بدل کننگ کن صوبہ غاتا چیف سیکرٹری تیا چٹھی نوشتہ کرینے۔ این ڈی ایم اے نا کنڈآن آزاد کشمیر تون اوار کل صوبہ غاتا چیف سیکرٹری تے 16 مارچ آ چتھی نوشتہ کننگا ہراٹی پاننگانے کہ کرونا وائرس ءِ پین تالان مننگ آن توننگ کن گام گیج کننگ نا بابت ملک اٹ تھری و فور اسٹار ہوٹل تے خالی کرفسا کرنٹائن سینٹر اٹ بدل کننگے۔ چٹھی ٹی نوشتہ کننگانے کہ کرونا وائرس نا اسہ شکبر ءُ بندغ اسے کن اسہ کمرہ نا پالیسی اس جوڑ کننگے، چٹھی ٹی دا ہم پارت کننگانے کہ این ڈی ایم اے ءِ کرنٹائن سینٹر نا بابت اٹ زوت اس معلومدار کننگے، یات سلے کہ پاکستان اٹ کرونا وائرس آن 2 بندغ تپاخت کرینے وخت اس کہ مچ آ ملک اٹ زہمی آ بندغ آتا کچ 307 مسنے۔ صوبائی و بنجائی حکومت نا کنڈآن کرونا وائرس نا تالانی ءِ توننگ کن ہر وڑ نا گامی گیج کننگ انگ ءِ۔ ہرانا رداٹ جتاجتا شارتا ہسپتال آتیٹی کرنٹائن وارڈ جوڑ کننگ انگ ءِ۔ داڑان بیدس تعلیمی سینٹر، دفتر و اُلسی ہند آتے بند کننگانے۔