بلوچستان ‘پوسکن آ 22 کیس آتیان پد کرونا غان زہمی تا کچ 45مس

کوئٹہ(اے پی پی) کوئٹہ(آن لائن) بلوچستان اٹ کرونا وائرس آن پین 22بندغ نا زہمی مننگ پک مننگ آن پد کچ 45مس‘ زہمی تے شیخ زاید ر فاطمہ جناح آئسولیشن وارڈ اٹ گدریفنگا۔ حوال نارد اٹ ایران تفتان سیم آن کوئٹہ غا بروک زائر‘پوریاگر‘ طالب علم آتے تفتان و میاں غنڈی قرنطینہ سینٹر اٹ رہینگوک 252 بندغ نا ٹیسٹ آتا رپورٹ بس ہرافتے ٹی پین 22بندغ اٹ کرونا وائرس پک مسنے داسہ کرونا وائرس نا ناجوڑ آتا کچ 45مسنے‘ 22 ناجوڑ ءِ شیخ زاید و فاطمہ جناح چیسٹ ہسپتال آ گدریفنگا۔ حکومت بلوچستان نا ترجمان لیاقت شاہوانی پک کرینے کہ بلوچستان اٹی کرونا وائرس آن زہمی بندغ آتا کچ 45مسنے، اونا رداٹ قرنطینہ ٹی رہینگوک آ 252بندغ آتا ٹیسٹ رپورٹ بسنے ہرافتے ٹی 29اٹی کروناوائرس پک مسنے، اوپارے کہ تفتان اٹی ہم 16بندغ نا ٹیسٹ رپورٹ اٹی کروناوائرس پک مسوسس۔ ترجمان حکومت بلوچستان پارے کہ کرونا وائرس آن زہمی ناجوڑ آتے آئسولیشن روم تیاگدریفنگ انگ ءِ ، و زہمی ناجوڑ آتے درمان نا غٹ آسراتی فراوان کننگ انگ ءِ۔کوئٹہ تون اوار مچ آبلوچستان اٹی کروناوائرس نا توننگ نا بابت صوبائی حکومت نا کنڈآن چست کروک آ گام گیج آتیا عملدرآمد نا چرجوئی برجاءِ ، پاک ایران بارڈرتفتان 26می دے وخت اس کہ پاک اوغان بارڈرسیم باب سنگتی چمن پنچ شنبے نادے 18می دے آہم بندئس ، ہڑتوم آ سیم تیا ہڑتوم آ کنڈآتا واپاری سرجزآتون اوار ہن و بر آ پورو پابندی برقرار ءِ ، تفتان اٹی زائر آتے قرنطینہ سینٹر اٹی تخنگانے، تدوک آدے تفتان آن 1652زائر آتے اوفتا صوبہ غاتیا راہی کننگانے تفتان آن راہی مروک آ 1230بندغ نا تعلق پنجاب، 232بندغ خیبر پختونخوا،190نا تعلق گلگت بلتستان و آزاد کشمیر آن ءِ، ضلعی انتظامیہ نا رداٹ تفتان سیم انا خڑک قرنطینہ ٹی پنچ سد بندغ ءُ ہرافتا ہرلحاظ اٹ خیالداری ءِ کننگ انگ ءِ غٹ بنداوی آسراتی ہرافتے ٹی ناشتہ، اِرغ اوار ءِ فراوان کننگ انگ ءِ، کوئٹہ ٹی میاں غنڈی قرنطینہ سینٹر اٹی ساڑی بندغ آتا کچ 600ءِ سینٹر انچارج نا رداٹ کیمپ اٹی ساڑی غٹ بندغ آتا خیالداری و درمان، ٹیسٹنگ نا آسراتی تے کن طبی عملہ 24گھنٹہ تینا خذمت آتے سر تننگ ءُ، ایلو کنڈتدوک آدے چیف سیکرٹری بلوچستان نا کماشی ٹی مروک آ دیوان اٹی کروناوائرس نا تالان مننگ نا توننگ نا بابت بڑزکو کہولی دیوان اٹی بھلا بھلا شاپنگ آتے بند کننگ، ہوٹل تیٹی تولنگ آ پابندی تون اوار ایلو گام گیج آتیا عملدرآمد کن ٹرانسپورٹر، پوریاگر آتون رابطہ کننگ انگ ءِ تانکہ اوفتے پت اٹی ہلسا دا فیصلہ غاتیا عملدرآمد کرفنگ مرے۔