درو اٹ بروک آ حکومت نا جوڑ کروک کانود آتے منپنہ،مولانا فضل الرحمن

0

Get real time updates directly on you device, subscribe now.

کوئٹہ :پاکستان ڈیموکریٹک موومنٹ(پی ڈی ایم) نا بنجائی صدر و جمعیت علماء اسلام نا سروک مولانافضل الرحمن پارینے کہ دھاندلی نا کمک اٹ بروک آ حکومت نا گچین کاری اصلاحات کن کانود جوڑ کننگ ءِ پش اس ہم منپنہ۔ اسہ وار دھاندلی کرسا اقتدار نا چَس ہلوک آک دوارہ ہندن ءُ پروگرام اس جوڑ کننگ اٹی ءُ، حکمران آتا نابودی ننا دعویٰ تے پک کرے۔ عمران خان کون آتے پاکستان آ بیٹ کرسا خیرخواہی نا جوزہ غا ملنڈ کننگ انگ ءِ۔ ننے دا بابت برانز کننگ نا پورو حق ارے۔ عمران خان پاکستان نا سیاست نا بے گرج ءُ بشخ اسے۔ توفک ہچ ءُ ویل اسے نا ایسر اف، توفک ہرفنگ آتیان خاہوت آتا خاہوت آک بھس مریرہ۔ پشتون و بلوچ آتیان زیات دا ہیت ءِ دیر چاہک کہ توفک نا پد انت ءِ؟ پیشن آن نوکری کن بروک بیرہ اسٹ اسے، ہرا مچ آ دنیا نا بینک آتے بھس کرینے، و ادسہ اسٹیٹ بینک انا بھسکاری نا زمواری ءِ ہرفینے، ریاست نا اِرا بنداوی بشخ دفاعی و زرگزرانی واکداری مریرہ، ولے بد بختی نا ہیت اسے کہ دفاوی واکدار آتیا سوج چست کننگانے، وخت اس کہ زرگزرانی واکداری نا حالیت دادے کہ مخلوق تینا چنا تے بہا کننگ آ بیوس ءِ، ہرانا 74سال نا تاریخ اٹ مَٹ رسینگپک، کبینی، بے روزگاری، غریبی و بیوسی بے ایمنی نا دا تے تیٹی قوم انا ہم کوپہ سلسا ناروا حکمران آتے ایوان اقتدار آن پیشن خسنہ۔ دا ہیت آتا درشانی ءِ او پی ڈی ایم نا کنڈ آن کوئٹہ ٹی کبینی نا برخلاف برانزی جلسہ غان تران کرسا کرے۔ دا وخت آ پشتونخواملی عوامی پارٹی نا سروک وپی ڈی ایم نا بنجائی نائب صدر محمود خان اچکزئی، نیشنل پارٹی نا سروک ڈاکٹر عبدالمالک بلوچ، پی ڈی ایم نا بنجائی حوالکاری سیکرٹری مولانا حافظ حمد اللہ، بلوچستان نیشنل پارٹی نا بنجائی نائب صدر ملک عبدالولی کاکڑ، پاکستان مسلم لیگ(ن) نا سرداریعقوب ناصر، پی ڈی ایم بلوچستان نا صدر ملک نصیراحمدشاہوانی، ڈاکٹر کلیم اللہ کاکڑ، مولوی سرور موسیٰ خیل، نصراللہ زیرے، میررحمت صالح بلوچ، موسیٰ بلوچ، حاجی بشیر احمد کاکڑ، و ایلوفک ہم ساڑی ئسر۔ مولانا فضل الرحمن پارے کہ سرزمین بلوچستان تیان تاریخ ءِ ایون اسہ وار ولدا زندہ کرینے و ناروا حکمران آتا برخلاف اینو نا دا بے مٹ آ برانز آ بلوچستان نا باتی تے سلام کیوہ۔ او پارے کہ اسٹیج آن قرارداد پیش کننگا ہرافتے نم منظور کریرے، کنے قرارداد آتتون اختلاف اف، ولے امنائی تون اوار اوفتیا تبصرہ ہم کیوہ۔ او پارے کہ نن اولیکو دے آن پارینہ، بلکہ وار وار پارینٹ کہ عمران خان پاکستان نا سیاست نا بے گرج ءُ بشخ اسے، نن پارین کہ دا ناروا ءُ حکمران اسے۔ اونا مسہ سال نا کارکڑد ننا دعویٰ ءِ پک کرے کہ او نابود اسے۔ او پارے کہ ریاست و اونا بقاء کن اِرا بنداوی گڑا مریرہ، مستین دافتیان اسٹ نا منہ فیصلہ اس اوڑا کیہی سوج آتے ودی کرینو، ہرا نن کن ارمان نا ہیت اسے کہ ننا دفاعی واکدار آتیا انتئے سوج چست کننگک، انتئے پر انگا جلسہ غاتیٹی اوفتیا شرہ مریک۔ ہندن لگک کہ جاگہ نہ جاگہ اس کمتی اس ارے، ننا دا تحریک تینا پیدوار ءُ موقف اس مون آ ایسنے کہ ننا ادارہ غاتے تینا آئینی دنگ انا کنڈ آ پدی ہنوئی ءِ، کہ اوفک جھیڑہ ئی مفس، و دا ملک انا بقاء نا سوب مننگ کیر۔

(آن لائن)

Get real time updates directly on you device, subscribe now.

Leave A Reply

Your email address will not be published.