نن خوانہ کہ اوغانستان پاکستان تون کمک کے،میر ضیاء لانگو

کوئٹہ : صوبائی وزیرداخلہ میرضیاء اللہ لانگو پارینے کہ نن خوانہ کہ اوغانستان پاکستان تون کمک کے و ایلم ملک آنبار مرے، اوغانستان نا مخلوق ہرا حکومت ءِ ہم گچین کے دا اونا حق ءِ‘ نن اومیت کینہ کہ داسہ اوغانستان نئے بیرہ پاکستان اٹ نیام تمنگ ءِ بند کیک بلکہ تینا ڈغار ءِ ننا برخلاف کاریم اٹ اتنگ کن ہم الیپک‘ گدرینگوک آبیست سال آن اوغانستان نا ڈغار پاکستان نا برخلاف کاریم اٹ بننگ اٹی ءِ‘ ہندوستان اوغانستان اٹ زر خلسا دہشت گرد آتے پاکستان و خاص وڑ اٹ بلوچستان اٹ امپورٹ کرسا بننگ ءِ۔ دا خیال آتا درشانی ءِ او خبرایجنسی تون خصوصی ہیت وگپ کرسا کرے‘ او پارے کہ اوغانستان اٹ ہر کس نا کہ حکومت مرے او مخلوق نا منشا اٹ مرے و الس ہر کس ءِ اتنت خواہے اوفک آجو مریر‘ اگہ طالبان تا حکومت مریک تو نن اومیت کینہ کہ گدرینگوک آ بیست سال آن اوغانستان نا ڈغار ہرا وڑ بلوچستان و پاکستان نابرخلاف کاریم اٹ بننگ اٹی ءِ۔ اودے بند کننگک‘ بھارت اوغانستان نا ڈغار ءِ پاکستان نا برخلاف کاریم اٹ اتنگ اٹی ءِ۔

(آن لائن)