اوغانستان نا بابت حکومتی پالیسی ءِ پارلیمنٹ اٹ اتنگے، اپوزیشن

کراچی/ اسلام آباد: چیئرمین پیپلز پارٹی بلاول بھٹو زرداری پارینے کہ نیشنل ایکشن پلان آ دمدستی عمل کننگے و اوغانستان نا بارو اٹ پارلیمنٹ ءِ پت اٹ ہلنگے‘ پاکستان نا اسہ انچ اسے ہم دہشت گرد آتا دوٹی تفنہ‘ سی پیک ڈٹ آتا سکیورٹی نا دمدستی اولسر جاچ ءِ ہلنگے‘ حکومت ءِ دہشتگرد آتے خوش کننگ نا رویہ ءِ الوئی تمک‘ حکومت چکار کپک تو دہشت گردی نا واقعہ غاک ودرہ‘ سَے شنبے نادے کراچی ٹی پریس کانفرنس کرسا چیئرمین پیپلز پارٹی بلاول بھٹو زرداری پارے کہ داسو، کوئٹہ و کراچی ٹی زوت آتیٹ دہشتگرد جلہو مسنے ہراکان گڈ پاکستان اٹ سی پیک ڈٹ آتا سکیورٹی نا دمدستی اولسرجاچ ءِ ہلنگے۔ حکومت دہشتگرد آتے خوش کننگ نارویہ ءِ الے۔ اوغان الس چین تیان مشکل آتتون مون ترسا بننگ اٹی ءِ‘ اوغانستان اٹ برجاحالیت آک گڑتی ناسوب ءُ ولے پاکستان نا پالیسی بایدے پیدوار مرے ولے اگہ حکومت چکار کتو تو دہشت گردی ودک۔ بلاول بھٹو پارے کہ اوغانستان نا ساڑی حالیت آک گڑتی ناسوب ءُ و نن اوغان نا الس نا بہادری ءِ سلام پیش کینہ‘ اوغانستان اٹ شاری تا جان و مال انا رکھ ءِ پک کننگے وخت اس کہ اوغانستان اٹ برجا حالیت آتا پاکستان آ ہم زہم تمک۔ اوپارے کہ پاکستان اٹ نیشنل ایکشن پلان آ بایدے پورو عمل کننگے۔ ٹی ٹی پی وایلو دہشتگرد تنظیمک پاکستانی الس ءِ شست کریر۔ اوغانستان اٹ اہل تشیع ءِ آجوئی اٹ عزاداری نا وارخواہی تننگے۔ چیئرمین پیپلز پارٹی پارے کہ ریاست پاکستان فاٹا و بلوچستان نا ورناتے بایدے گٹ کے وخت اس کہ ریاست پاکستان ءِ آئینی و کانودی قول تے پورو کروئی تمک۔ داکان بیدس مسلم لیگ (ن) نا بنجائی راہشون و مسکوہی وزیراعظم شاہدخاقان عباسی پارینے کہ ملک اٹ احتساب نا عمل کل انا مون آٹے۔ چیئرمین نیب حکومتی کرپشن ءِ خنپک۔ اوغانستان نا باندات بھاز ول ویچڑ ءِ‘ حکومت پالیسی جوڑ کننگ آن مست اوڑا پارلیمنٹ اٹ شرہ کننگے۔ میڈیا تون ہیت وگپ کرسا مسکوہی وزیراعظم پارے کہ ایل این جی ٹی ساڑی حکومت کرپشن کرینے‘ ساڑی حکومت ایل این جی کبین ہلکنے‘ چیئرمین نیب ءِ حکومتی نا کرپشن نظر بفننگ ءِ‘ او مستی پارے کہ ملک اٹ احتساب نا عمل نا حالیت نا کل ءِ سماءِ‘ مسہ سال آن پاننگ اٹی ان کہ عدالتی کارووائی کن کیمرہ خلنگے تاکہ پن انا احتساب نا عمل ءِ کل خنر‘ ساڑی حکومت ہمو ٹرمینل تون ودکی معاہدہ کننگ خواہک۔ او پارے کہ اوغانستان نا باندات بھاز ول ویچڑ ءِ اوغانستان نا بارو اٹ حکومت نا انت کہ پالیسی مریک اونا زہمک ہم زیات مریرہ ہندا سوب آن پالیسی اس جوڑ کننگ آن مست اوڑا پارلیمنٹ اٹ شرہ کننگے۔

(آن لائن)