ملاعبدالغنی برادر اوغانستان ءِ سر مس

کابل: اوغان طالبان تا قطردوحہ ٹی جوڑ سیاسی دفتر نا سروک ملاعبدالغنی برادر قطر آن خصوصی جہاز اٹ کابل آسر مسنے‘ میڈیا رپورٹ آتا رد اٹ طالبان تا دوحہ ٹی جوڑ سیاسی دفتر نا حوالی پارینے کہ ملاعبدالغنی برادرتحریک طالبان نا کنڈآن آخبت نا لائحہ عمل ناپڑو ءِ کیک و اوغان الس ءِ پت اٹ ہلیک۔ ملا عبدالغنی برادر طالبان تا امیر ملا ہیبت اللہ اخوندزادہ نا اہم انگا نائب آتیان ءِ‘ ملا محمدیقوب و سراج الدین حقانی ہم اہم انگا نائب آتے ٹی اوار ءُ‘ اوفک ہمو وخت آ جہانی کہول آ درستی راستی مسر ہرافتم او فروری 2020 آ قطر نا شار دوحہ ٹی مروک امن معاہدہ غا دستخط کریر‘ ملا برادرامارت اسلامی اوغانستان نا نائب امیر ءِ و اوڑتون طالبان تا قطر اٹ جوڑ سیاسی دفتر نا انچارج نا عہدہ ہم ارے‘ داکان مست طالبان تا ”دعوت وراہنمائی کمیشن“ ڈاکٹر امیر خان متقی کابل آسر مسوسس او اوغان سیاستدان تتون اوڑدہی کرے‘ اوغان نشریاتی ادارہ نا رد اٹ ڈاکٹرمتقی مسکوہی اوغان صدر حامد کرزئی، قومی مصالحتی کونسل نا چیئرمین عبداللہ عبداللہ و مشرانو جرگہ نا چیئرمین عبدالہادی مسلمیار تون اوڑدہی کرینے ولے طالبان تا اسہ ترجمان اس ہم دا پیش رفت ءِ سرکاری کہول آ پک کتنے۔ ایلو کنڈ آ اوغان طالبانک مچ آ اوغانستان اٹ ”عام معافی“ نا پڑ وکریر و نیاڑی تے سلہ خلکنو کہ او اوفتا حکومت اٹ اوار مریر۔ درملکی خبر رساں ادارہ نا رپورٹ نارد اٹ دا بیان طالبان تا ربیدہ ئی کمیشن نا باسک انعام اللہ سمنگانی نا کنڈآن مون آبسنے۔ انعام اللہ اوغانستان اٹ تینا حکومت کن امارات اسلامیہ نا اصطلاح ءِ کاریم اٹ اتسا پارے کہ امارات اسلامیہ خواپک کہ نیاڑیک زہمی مریر‘ شرعی کانود نارد اٹ اوفک بایدے حکومتی اسٹرکچر اٹ اوار مریر‘ او مستی پارے کہ حکومت نا اسٹرکچر پورو وڑ اٹ پیداوار اف ولے آزموندہ نابنداو آ اسہ پورو ءُ اسلامی سرکڑدہ ئی اس بایدے مرے و کل پڑک آک اوٹی اوار مریر‘ او دا بابت پین جم معلومداری فراوان کتو ہراڑان دا پک مریک کہ مخلوق ءِ مہالو آن اسلامی کانود آتا سماءِ۔

(آن لائن)