طالبان تے مننگ نا فیصلہ ءِ دنیا تون اوار کینہ، پاکستان

0

Get real time updates directly on you device, subscribe now.

اسلام آبا د: بنجائی حوالکاری وزیر فوادچوہدری پارینے کہ اوغانستان نا بابت تنیائی اٹ فیصلہ کننگ خواپنہ، جہانی واکدار آتا اواری اٹ لائحہ عمل اس جوڑ کینہ۔ سنگت ملک و اوغان ٹولی تتون رابطہ ٹی اُن، طالبنا تے پارینن کہ اوغان ڈغار ہچ گہس پاکستان نا برخلاف کاریم اٹ اتنگپ، وزیراعظم عمران خان نا تحریک انصاف حکومت ءِ مسہ سال پورو کننگ آ مبارکبادی ایتوہ۔ سوگ و ریاست مدینہ نا وڑ اٹ ملک ءِ چلیفنگ اُن۔ سَے شنبے نا دے وزیر اعظم نا کماشی ٹی بنجائی کابینہ نا دیوان آن پد میڈیا ءِ بریفنگ ترسا بنجائی حوالکاری وزیر پارے کہ اوغانستان اٹی پر امن بدلی ستا کڑزک۔ اومیت ءِ کہ طالبانک انسانی حق آتا خیال ءِ تخرہ۔ اوغانستان اٹی طالبان حکومت ءِ مننگ نا بابت تنیا ہچ ءُ فیصلہ اس کپنہ۔ جہانی برادری نا اواری اٹ اوغانستان نا بابت فیصلہ اس کینہ۔ اوغانستان نا بابت سنگت ملک آتتون رابطہ کرینن، وزیر اعظم سلاہ تسوسس کہ گچین کاری تیان مست ہرتوم آ کنڈ آک ہیت و گپ کن مونی بریر۔ او پارے کہ اشرف غنی ءِ پاریسن کہ نی تنیا حکومت ءِ چلیفنگ کپیسہ۔ اوغانستان اٹی بدلی بسنے، ولے داٹی ہچ ءُ کشت و خون اس متو، او پارے کہ وزیراعظم عمران خان و ترک صدر رجب طیب اردوان اوغانستان نا حالیت آ سرجم ہیت و گپ کرینو۔ وزیر اعظم حالیت آتیا کابینہ تون ہم ہیت کرینے، حوالکاری وزیر پارے کہ چین داسکان طالبان تے امنا کننگ نا فیصلہ کتنے۔ قومی سلامتی کمیٹی ٹی نن اوغانستان نا بابت اسہ بنداوی شڑت اس تخان، نن ترکی، چین و امریکہ تون سلاہ غان پد فیصلہ اس کینہ۔ اونا پاننگ ئس کہ طالبان تا ترجمان سہیل شاہین نا جند پارینے کہ اوغان ڈغار ءِ ایلو ملک آتا برخلاف کاریم اٹ اتنگ کن الیپنہ۔ دا پک ءُ ہیت اسے، کہ کس ءِ دہشت گردی کن اوغان ڈغار ءِ کاریم اٹ اتنگ کن الیپنہ۔ بنجائی وزیر پارے کہ کابینہ دیوان اٹی وزیراعظم اسہ وڑ نصاب تعلیم اس اتنگ آ وزیر تعلیم ءِ مبارکبادی تس۔ اسہ وڑ نصاب تعلیم آن راج اٹی تپہ ئی فرق چٹک۔ وزیراعظم مڈل و سیکنڈری نا کلاس آتیٹی سیرت النبیؐ خوانفنگ آ زور شاغانے، حکومت اسہ وڑ نظام تعلیم رائج کننگ نا قول ءِ ہم پورو کرے۔

(آن لائن)

Get real time updates directly on you device, subscribe now.

Leave A Reply

Your email address will not be published.