کرونا وائرس نا توننگ کن الس ءِ بھاز زیات احتیاط کننگ نا گرج ءِ، ثناءبلوچ

کوئٹہ(اے پی پی) بلوچستان نیشنل پارٹی نا باسک صوبائی اسمبلی واجہ ثناءاللہ بلوچ پارینے کہ کرونا وائرس نا توننگ کن الس ءِ بھاز زیات احتیاط کننگ نا گرج ءِ وائرس ءِ تالان مننگ آن توننگ کن دو ہلنگ آن پاناد کننگے ہوٹل آتیا مچی ہند و مچی تیان پاریز کننگ المی ءِ باشعور تپہ خاص کر ورناک شعوری آگاہی ءِ مون آ دننگ کن تینا فعال کڑد ءِ ادا کرسا دا نازرک و حساس حالیت آتے ٹی تینا راجی زمواری تے پورو کیر۔ داخیال آتا درشانی ءِ او سریاب روڈ آ چندی علاقہ غاتے ٹی کرونا وائرس نا توننگ و تدارک کن رکھی گام گیج آتا آگاہی پروگرام آن تران کرسا کرے۔ واجہ ثناءاللہ بلوچ پارے کہ ننے انحصار ءِ چٹفسا تینا رکھ ءِ تینٹ کروئی مریک ایران نا کسر آن بلوچستان اٹی کرونا وائرس نا تالانی اسہ گڑتی نا پہلو اسے نن دا بابت بھاز مہالو تینا گڑتی تا درشانی ءِ اسمبلی فلور و میڈیا غا کریسن ، بلوچستان آن زائر آتے داسہ تینا تینا صوبہ غاتیا گدریفنگ انگ ءِ بناٹی گچین حکمت عملی اختیار کننگاکہ تو تالانی ناکچ ءِ کنٹرول کننگ مسکہ۔ ثناءبلوچ پارے کہ ساڑی حالیت آتے ٹی الس ءِ احتیاطی تدابیر آ سختی اٹ عملدرآمد کروئی مریک داوخت اسکان کرونا وائرس نا ہچ ءُ ویکسین اس اف دانا توننگ پاریزگری اٹ مننگ کیک الس تینا گچین فائدہ غاتے ٹی تینا رکھ ءِ تینٹ کیر ثناءبلوچ سریاب نا چندی علاقہ غاتے ٹی ہینڈ واش، ماسک و احتیاطی تدابیر نا بابت الس ءِ ڈیمو نا کمک اٹ آگاہی تس۔