تفتان اٹ کرونا وائرس کن لگوک کرنٹائن ہتم نا میلہ غانبار خننگک، ہاشم نوتیزئی

نوکنڈی (آن لائن) کروناوائرس نا بابت ننا گڑتیک پک مسر‘ تفتان اٹ قرنطینہ سینٹر نا جاگہ غا ہتم نا میلہ خلنگانے۔ صوبائی حکومت میلہ خلنگ نا جاگہ غا بندغ آتا جان تے بچفنگ کن ایمرجنسی بنداو آ عملی گام گیج کے۔ دا خیال آتا درشانی ءِ بلوچستان نیشنل پارٹی نا راہشون و ایم این اے رخشان ڈویژن حاجی میر محمد ہاشم نوتیزئی نوکنڈی نا صحافی تتون ٹیل فون آہیت وگپ کرسا کرے۔ اوپارے کہ نن قومی اسمبلی ٹی تینا گڑتی تا درشانی ءِ کریسن کہ ہلہلہ ئی بنداو آ گام گیج کننگے۔ ہیبداربست وبند کروک آتا برخلاف کارروائی کننگے‘ بلوچستان نا نابود آ حکومت ءِ بلوچستان نا الس نا ہچ پرواہ اف۔ صوبائی حکومت ناغلط انگاپالیسی تا سوب آن کنا حلقہ نا الس نا جان تے خطرہ ءِ۔ رخشان ڈویژن اٹ صوبائی حکومت ناکنڈآن کرونا نا بابت ہچ گام گیج کننگ تنے‘ صوبائی حکومت سیمی علاقہ غاتے سیل کے تاکہ گمانی ناجوڑ آتا بننگ ءِ توننگ مرے‘ او پارے کہ وزیراعلیٰ سندھ انا موقف راست ءِ کہ کرونا نا غٹ ناجوڑ آک تفتان آن بسر‘ ڈاکٹر ظفر مرزا ہم پارنے کہ صوبائی حکومت نا ہیبدار بست وبند آتا سوب آن کرونا نا دَین تالان مس۔