کرونا وائرس، جہانی و ایشیائی شونداری بینک انا پاکستان ءِ کروڑ آ ڈالر آتا سلہ

0

Get real time updates directly on you device, subscribe now.

اسلام آباد( آن لائن )کرونا وائرس تون مون تننگ کن جہانی بینک و ایشیائی شونداری بینک پاکستان ءِ مالی کمک نا سلاہ خلکنے۔ حوال نا رداٹ پاکستان اٹ کرونا وائرس تینے جاگہ تننگ نا کوشست کننگ اٹی ءِ۔ دا وخت اسکان پاکستان اٹ کرونا وائرس نا 245 کیس رپورٹ مسنو ہرافتا سوب آن جہانی بینک و ایشیائی شونداری بینک پاکستان ءِ مالی کمک نا سلاہ خلکنے۔ ایشیائی شونداری بینک پاکستان ءِ کل 35 کروڑ ڈالر ایتک۔ ہرافتیان 5 کروڑ ڈالر کرونا وائرس تون مون تننگ کن تننگک۔ جہانی بینک ہم18 کروڑ 80 لکھ ڈالر تننگ نا سلاہ خلکنے۔ پیسہ غاتے زوت اس ہپستال آتیا گدریفنگک۔ پاکستان و جہانی شونداری ادارہ غاتا نیام اٹ معاہدہ زوت اس مننگ نا گمان ارے۔ دا فنڈ آک کرونا وائرس آ کنٹرول کننگ کن این ڈی ایم اے نا کمک اٹ خڑچ کننگرہ۔ اے ڈی بی نا کنڈآن ہم 5 کروڑ ڈالر زوت اس جاری کننگ نا گمان ارے۔ ایلو کنڈآ انٹرنیشنل مانیٹری فنڈ (آئی ایم ایف) حکومت آتیا زور شاغانے کہ اُلس ءِ کرونا وائرس آن ودی مروک آ جہانی طبی کاختی نا زرگزرانی اثر تیان زوت اس رکھنگے۔ واشنگٹن اٹ آئی ایم ایف نا کنڈآن جاری گائیڈ لائن اٹ پاننگانے کہ ہرا کل آن زیات زہمی ءِ اودے تینا ردی آن بیدس فریشانی نا گواچی مروئی اف، سیلی تیا گزارہ کروک آ ملک آتیٹی اسہ ریسٹورنٹ یا کرنٹائن نا سوب آن بند مروک آ فیکٹری تا ملازم آتے دا سختی ٹی کمک نا گرج ءِ۔ آئی ایم ایف پارینے کہ اوفتتون 50 ارب ڈالر ہلہلہ ئی کمک کن تخوک ءُ، ہرافتے اوفک وائرس آن زہمی ملک آتا کمک ءِ کیرہ، بیان اٹ آئی ایم ایف نا مینیجنگ ڈائریکٹر کرسٹالینا جارجیوا پارینے کہ ننے دانا بدلہ ٹی بیرہ دا ضمانت گرج ءِ کہ بندغ آک تو پیسہ نا سوب آن کہنگ اٹی افس، فنڈ انا پڑو ءِ کرسا آئی ایم ایف نا کماش دا پڑو ءِ ہم کرے کہ ادارہ مالی کمک کن ننتون حال احوال کروک آ مارکیٹ آتے 40 ارب ڈالر تننگ کینہ او پارینے کہ آئی ایم ایف تینا باسک ملک آتے، خاص کر خطرہ غاتون مون تروک آتون کمک کننگ نا خواہندار ءِ۔

Get real time updates directly on you device, subscribe now.

Leave A Reply

Your email address will not be published.