آئی سی سی ایونٹ آتا مہمانداری کن تروک آ ڈیڈ لائن ایسر

 ممبئی(مانیٹرنگ ڈیسک) آئی سی سی ایونٹ نا مہمانداری کن ڈیڈ لائن ءِ ایسر کرے وخت اس کہ بگ تھری ملک آتا کنڈآن اُست خواہی ہلپننگ نا دعویٰ کننگ انگ ءِ۔ انٹرنیشنل کرکٹ کونسل 2023 آن 2031 اسکان نا تینا ٹورنامنٹ آتا مہمانداری کن پکا غا او ایسوسی ایٹ ملک آتیان اُست خواہی نا خواہندار ئس، داڑکن جتا کروک آ 15 مارچ نا ڈیڈ لائن داسہ گدرینگانے۔ بھارتی میڈیا نا کنڈآن دعویٰ کننگانے کہ بگ تھری بورڈ آک بھارت، انگلینڈ وآسٹریلیا دا بابت اٹ ہچو ردعمل اس ظاہر کتوس، بیرہ امریکہ و ویسٹ انڈیز کرکٹ بورڈ نا کنڈآن پوسکن آ وخت اٹ ٹی 20 ورلڈ کپ نا مہمانداری نا بابت اٹ اُلسی کہول نا اُست خواہی نا درشانی کننگاسس۔ بی سی سی آئی کمامدار آک پارینو کہ آئی سی سی مہمانداری کن اُست خواہی خواہسا اونا مسخت بھارت، انگلینڈ و آسٹریلیا آ پریشر شاغنگ ئس ولے او تینا دا چال اٹ سرسہب متو۔ کونسل دا بابت اٹ ہر وڑ انا تبصرہ کننگ آن نمن مس وخت اس کہ دا وخت اسکانآفیشل وڑ اٹ پاننگتنے کہ بروک آ ایونٹ آتیکن پین اخس اُست خواہی نا درخواست دوئی مسنے۔ یات سلے کہ آئی سی سی نا چیف ایگزیکٹیو مانو ساہنی نا آفس آن اینخو13 فروری آ باسک آتا بورڈ آتے کروک آ ای میل اٹ دا پاننگاسس کہ اُست خواہی کن بروک آ ایونٹ آتیکن بنائی عمل نا بنا کننگ اٹ کمک رسینگک۔ فٹبال، رگبی و باسکٹ بال تینا گوازی نا جوانی کن پوسکن آ ملک آتیٹی ورلڈکپ کرفینو، آئی سی سی ہروخت تینا متکن آ باسک آتیان بیدس ایلو باسک آتے ایونٹ نا مہمانداری تننگ آن خلیک۔ 2015 آن 2023 اسکان کل 6و اگہ دافتے ٹی آئی سی سی ٹیسٹ چمپئن شپ فائنل ءِ اوار کننگے تو 7 ایونٹ نا مہمانداری آسٹریلیا، انگلینڈ و بھارت ءِ تننگاسُس۔