وزیراعظم نا ترکیہ ٹی زمی جمب آن زہمی علاقہ غاتا دورہ
آدیامان اٹی پاکستان نا ریسکیو و ریلیف ٹیم تتون اوڑدہی کرے، برجا ریسکیو آپریشن نا جاچ ءِ ہلک
Get real time updates directly on you device, subscribe now.
انقرہ : وزیراعظم محمد شہباز شریف ترکیہ ٹی زمی جمب آن زہمی علاقہ غاتا دورہ ءِ کرے۔ وزیراعظم آفس نا میڈیا ونگ آن جاری بیان نا رداٹ وزیراعظم ترکیہ نا شار آدیامان اٹی پاکستان نا کنڈآن گدریفوک آ کمکی گڑاتے ترک کمامدارآتا دوٹی تس۔ وزیراعظم آدیامان اٹی پاکستان نا ریسکیو و ریلیف ٹیم تتون اوڑدہی کرے، و برجا ریسکیو آپریشن نا جاچ ءِ ہلک۔ اوکان پد وزیراعظم آدیامان یونیورسٹی ٹی زمی جمب آن زہمی تتون اوڑدہی کرے، و اوفتا کمک کن جوڑ سینٹر نا دورہ ءِ کرے۔ وزیراعظم شہباز شریف ترک و زیر و کمامدارآتون اوڑدہی کرے، ہراڑے اودے برجا کمکی سرجزآتیا سرجمی اٹ حوال تننگا۔وزیراعظم محمد شہباز شریف پاکستان نا کنڈآن ترکیہ نا زمی جمب آن زہمی تیکن کمکی گڑاتے ترک کمامدارآتا دوٹی تس۔ جمعہ نادے آ وزیراعظم محمد شہباز شریف دورہ ءِ ترکیہ ٹی آدیامان آ ہنا ہراڑے او زمی جمب آن زہمی تیکن جوڑ سینٹر اٹی زہمی تتون اوڑدہی کرے و پاکستان نا کنڈآن مون تروک آ کمکی گڑاتے ترک کمامدارآتا دوٹی تس۔ داوخت آ وزیراعظم پارے کہ پاکستان تینا ترک ایڑھ ایلم تا ہر ممکن کمک ءِ کیک۔ اوپارے کہ زہمی تے یخ آتا تمبو تا کمک ءِ برجاتخنگک۔ داکان بیدس نیشنل ڈیزاسٹر مینجمنٹ اتھارٹی نا کنڈآن نیشنل لاجسٹکس سیل (این ایل سی) نا ٹرالر آک ترکیہ و شام انا زمی جمب آن زہمی تیکن کمکی گڑا ہرفسا تفتان آ سرمسنو۔ ترجمان این ڈی ایم اے نا رداٹ وزیراعظم نا پارت نا رداٹ ساڑی آ ترند انگا زمی جمب آن زہمی سنگت ملک ترکیہ و شام انا مخلوق کن گدریفوک آ اولیکو کمکی قافلہ پاکستان نا ایران اتون گنڈوک سیمی شار تفتان آ سرمسنو۔ کمکی گڑاتیٹی تمبو، کمبل و ایلو المی آ گڑاک اوار ءُ۔ 21 ٹرالر آتیا تالان د اگڑاتے بذریعہ سڑک تفتان آن براستہ ایران ترکیہ و شام آ روانہ مریک۔
(اے پی پی)