ضمنی بجٹ نا سوب آن ہر گڑا نا نہاد ودانے، سینیٹ

اسلام آباد : سینیٹ نا باسک آک پارینو کہ ضمنی بجٹ نا سوب آن دوائی و کنوئی آ گڑاتا نہاد آتیٹی ودکی مس و کبینی ودانے، لس بندغ ءِ ریلیف تننگ کن گام گیج کننگ نا گرج ءِ۔ جمعہ نادے آ سینیٹ نا دیوان اٹی مالیاتی (ضمنی)بل 2023 آ گپ وتران کرسا سینیٹر مشتاق احمد پارے کہ پیٹرول، کنوئی آ گڑاتا نہاد آتیٹی پدریسہ ودکی آن غریب شاریک فریشان ءُ، کفایت شعاری کن گام گیج کننگے، اشرافیہ نا آسودہی تے چٹفنگے، سرکاری آفیسر و ملازم آتے سرکاری پیٹرول نا فراوانی ءِ بند کننگے۔ سینیٹر طاہر بزنجو پارے کہ اپوزیشن انسانی حق آ ہم بایدے ہیت کے۔ سینیٹر محسن عزیز پارے کہ آئی ایم ایف تون معاہدہ نا دستاویز آتے ایوان اٹ پیش کننگے، مون آ اتنگے کہ آئی ایم ایف تون معاہدہ دیر اس کرے و دیر اس پرغا، کبینی ٹی ودکی مسنے، نیامی تپہ ہم مشکل آتا گواچی ءِ، کفایت شعاری آ عمل کننگے، اسمگلنگ نا توننگ ءِ پک کننگے۔ سینیٹر کامل علی آغا پارے کہ ضمنی بجٹ آن لس بندغ زہمی مسنے، ہر گڑا غا خراج خلنگانے۔ سینیٹر حاجی ہدایت اللہ پارے کہ دوائی و کنوئی آ گڑاتا نہادآک ودانو۔ سینیٹر ولید اقبال پارے کہ منی بجٹ آن نیگار الس آ بھاریم اس شاغنگانے۔ سینیٹر ہدایت اللہ خان پارے کہ منی بجٹ نا مخالفت ءِ کیوہ، الس آ بایدے بھاریم شاغنگپروسس۔ غٹ جماعت آک سجفر کہ آئی ایم ایف نا چنگل آن امر پیش تمنہ، غٹ سیاسی جماعت آک تینا جمہوریت ودی کیر۔ داکان بیدس سینیٹ اٹی قائد حزب اختلاف سینیٹر ڈاکٹر شہزاد وسیم پارینے کہ منی بجٹ ءِ دمدستی پدی ہلنگے و الس ءِ ریلیف تننگے۔ جمعہ نادے آ سینیٹ نا دیوان اٹی مالیاتی (ترمیمی)بل 2023ء آ گپ وتران کرسا سینیٹر ڈاکٹر شہزاد وسیم پارے کہ ضمنی بجٹ ءِ دمدستی پدی ہلنگے۔ سیاست و ریاست نا مرکز و وت الس مریک۔ ضمنی بجٹ نا سوب آن الس ءِ کبینی و مشکل حالیت آتا مون تروک ءِ۔ ملک انا خواتہ مننگ نا خطرہ داسکان چٹتنے، آئی ایم ایف نا خواست آ 170 ارب روپئی نا خراج خلنگا۔ اوپارے کہ جہانی کہول آ پیٹرولیم مصنوعات آتا نہاد آتیٹی کمتی بننگ ءِ۔ الس ءِ ریلیف تننگے۔ کنوئی آ گڑاتا نہاد آتیٹی پدریسہ ودکی مننگ ءِ۔ بیرہ عمران خان ہی اومیت نا روشنائی ءِ۔ عدلیہ نا برخلاف مہم چلیفنگ انگ ءِ۔ اوپارے کہ ملک ءِ سہی کنڈآ دننگ المی ءِ، ہڑتوم آ صوبہ غاتیٹی گچین کاری کرفوئی تمک، لس گچین کاری تے دمدستی کرفنگے۔

(اے پی پی)