پی ٹی آئی ملک ءِ آئی ایم ایف تون گہو تخا، سینیٹر اعظم تارڑ

اسلام آباد : بنجائی وزیر کانود و انصاف سینیٹر اعظم نذیر تارڑ پارینے کہ پی ٹی آئی نا حکومت زرگزران اٹی بارودی سرنگ تالان کرسا ہنا، نن اونا آئی ایم ایف تون کروک آ معاہدہ غاتے پورو کننگ اُن، جیل بھر و تحریک نا نعرہ ءِ خلوک آک عبوری ضمانت کن منت کننگ اٹی ءُ، نیزگار آتا زند اٹ آسانی کن نن بایدے سنجیدہ ءُ سیاست اس کین۔ جمعہ نادے آ سینیٹ نا دیوان اٹی مالیاتی (ترمیمی) بل 2023آ گپ وتران کرسا وزیر کانود و انصاف سینیٹر اعظم نذیر تارڑ پارے کہ قائد حزب اختلاف تینا است انا لیار ءِ کشا، آئین نا تینا روایت آک ءُ، نن غٹ انا ہیت ءِ بِننہ، کبینی آن غریب بندغ ءِ مشکل آتون مون تروئی تمک، داڑا کس اس خوش مفک، آئی ایم ایف تون پیٹرول، بجلی نا نہاد، اسٹیٹ بینک نا مارک اپ تون اوار ایلو امور نا معاہدہ دیر اس کرے، نن اونا برخلاف توار بڑز کرین کہ داوڑ کپہ، زرگزران اٹی بارودی سرنگ دیر اس رتالان کرے، داسہ چار تُو آن پٹی ءِ تفسا توس، دا جیل بھرو تحریک نا ہیت ءِ کیرہ، او زندان آن بچنگ کن عبوری ضمانت نا درخواست تسر، زندان غریب آتیکن ءِ، اسلام آباد نا سیشن عدالت غبن نا مقدمہ ٹی پدریسہ بٹنگ انگ ءِ، دا پدریسہ میڈیکل گدریفنگ ءِ، تماشہ دادے کہ ہیت داسہ سپریم کورٹ آ سرمسنے، اونا حلیف جج آتا بابت ٹیل فون آپارت ایتک، آڈیو لیک آن مچ آ نظام نا نقاب دڑانے، عدالت آتیا ہورہرفوک آ تینا زنچک اٹ ہرے۔ اوپارے کہ مسکوہی حکومت نا دور اٹی مخلوق مسہ مسہ سال زندان کاٹا، او عبوری ضمانت آتیکن ہنتور، آئی ایم ایف تون تدوک آ سال نی معاہدہ کریس۔ دامعاہدہ غان 840 ارب نا ٹیکہ لگاسس، نن دا 170 ارب روپئی اسکان ایسن، پرتعیش گڑاتیا خراج خلنگانے تانکہ غریب آدمی زہمی مف، نا کرتوت آتا سوب آن سیوتیک نے اِلار، آئین نا رداٹ بیرہ گیشتری تخوک آ ہی وزیراعظم جوڑ مننگ کیک، اواسہ بندغ اسے بچفنگ کن مچ آ اسمبلی ءِ تحلیل کرے، زرگزران ءِ برباد کرینے، دا بربادی آن ملک ءِ بچفنگ کن کمک کے، اواری اٹ ملک ءِ بچفوئی ءِ، دا جوزہ ئی ءُ تقریر کرسا تینا گناہ تیا پڑدہ شاغنگ کپک، غریب آتا زند اٹی آسانی کن نن بایدے میچور سیاست کین۔

(اے پی پی)