عمران خان نا 22 فروری آن ’جیل تحریک‘ ءِ بنا کننگ نا پڑو

لاہور : پاکستان تحریک انصاف نا چیئرمین عمران خان 22 فروری چار شنبے آن ’جیل بھرو تحریک‘ نا بناکننگ ناپڑو کرسا پارینے کہ اول اٹ لاہور‘ ولدا ایلو بھلا شار تے ٹی جیل تے پُر کینہ‘قوم خلیس نا بت آتے پرغنگ کن مونی برے‘ دا فرعون آنبار خلیفرہ۔ دا خیال آتا درشانی ءِ او لاہور آن ویڈیو لنک آ تران کرسا کرے۔ عمران خان پارے کہ چار شنبے 22 فروری آن جیل تحریک نا بناءِ کننگ اٹی ان و تینا پارٹی ءِ پاوہ کہ تیاری کبو۔ عمران خان پارے کہ جیل تحریک نا بنا لاہور آن مریک و ولدا پاکستان نا ہر بھلا شار اٹ تحریک نا بنا کننگک۔ او پارے کہ ای ہمو کل بندغ آتا منتوار اٹ ہرافتے سما تمک کہ کنے دزگیر کننگ کن بننگ ءُ تو او مچ آ نن اُرا نا مون آ مچ مرسا نعرہ خلیرہ ولے ای اوفتے ہم پاوہ کہ دزگیر مننگ دن ءُ بھلو ہیت اس اف‘ نن ہنداخس دزگیری ایتنہ کہ اوفتتون زندان تے ٹی جاگہ مفک۔ عمران خان پارے کہ اوفتے انت لگک کہ او جیل انا خلیس آن ملک اٹ ہر وڑ انا بیداد کیرہ‘ دز آتے بیٹ کیرہ و ولدا دز آک ننے جیل آن خلیفرہ‘ کبینی الس ءِ خوار کرینے‘ او پارے کہ چار شنبے آن ننا تحریک بنا کیک و مچ آ پاکستان اٹ سرمریک‘ ہندا سوب آن قوم ءِ ہم داٹی اوار مننگ ناسلہ خلیوہ۔ پی ٹی آئی نا چیئرمین عمران خان پارے کہ نن رضاکارانہ وڑ اٹ اسمبلی تے پرغان تاکہ نیوٹرل ءُ نگران حکومت اس برے ولے ننا مخالف آتے بڑزا تولفسا ننے زیزاریفنگ انگ ءِ۔ عمران خان پارے کہ 25 مئی 2022 آ ننا برانزآ لٹ وکٹ کروک 23 افسر نا پن تے تسن ولے پنجاب نا نگران حکومت ہموفتیان 16 ءِ ولدا تعینات کرینے۔ عمران خان پارے کہ چیف جسٹس لاہور ہائیکورٹ نا سالم علی سائی کن اول اٹ اسہ بندغ اسے دزگیر کرسا اوڑا بیداد کرسا اونا کمک اٹ مقدمہ جوڑ کننگا و داسہ قومی احتساب بیورو (نیب) نا کمک اٹ اودے بٹنگ انگ ءِ۔ عمران خان پارے کہ ہراتم اعظم سواتی آ بیداد کننگاکہ تو اودے ہندا پاننگاکہ کہ عمران خان ءِ پا کہ اوڑتون ہم ہندن مریک۔ او پارے کہ ای تینے مروک جلہو نا مہالو پاریسٹ ولے ہرافک جلہو کریر اوفک اقتدار اٹ ئسر‘ ہرافتیان اسٹ ’ڈرٹی ہیری‘ ئس وایلو کنڈآ رانا ثناء اللہ و شہباز شریف ئس۔ عمران خان پارے کہ نگران حکومت نا کاریم گچین کاری کرفنگ مریک ولے او بننگ تون کل آن مست جے آئی ٹی ءِ بدل کرے۔

(آن لائن)