بلوچستان نا 209 سال نا کل کانود آک نوشت اٹ اتنگار

کوئٹہ : محکمہ کانود بلوچستان 1812 غان 2021 اسکان 209 سال انا تاریخ آ ساڑی کل کانود آتے نوشت اٹ ایسنے‘ وکیل‘ الس و محکمہ غاتا آسراتی کن کل نوشتہ ئی مواد آتے محکمہ کانود نا ویب سائٹ آ ہم اپ لوڈ کننگا۔ پارلیمانی سیکرٹری کانود و پارلیمانی امور ڈاکٹر ربابہ خان بلیدی ناکماشی ٹی محکمہ کانود کوڈیفیکشن سیکشن نا ڈائریکٹر مزمل حسین و ڈپٹی ڈائریکٹر حفیظ اللہ تینا ٹیم اتون اوار بھاز خواری و چکار اٹ کل کانود‘ نوٹیفکیشن، کانودی راہشونی آ ساڑی حوالہ غاتے شش جلد اٹ شینک کرسا کل والیم تے پورو کرینے‘ جمعہ نا دے پارلیمانی سیکرٹری کانود و پارلیمانی امور سائنس اینڈ انفارمیشن ٹیکنالوجی ڈاکٹر ربابہ خان بلیدی تون ڈائریکٹر کوڈیفیکشن مزمل حسین، ڈپٹی ڈائریکٹر حفیظ اللہ و مسکوہی ڈائریکٹر پارلیمانی افیئرز سعیداللہ اوڑدہی کرے و محکمہ کانود بلوچستان نا آخریکو پک اپ ڈیٹ والمی تاپوروی و شینک کروک جلد آتے پیش کرے۔ڈاکٹر ربابہ خان بلیدی دا مشکل آ ٹاسک اناپورو کننگ آ ڈائریکٹر و ڈپٹی ڈائریکٹر کوڈیفیکشن تون اوار مچ آ ٹیم ءِ خراج تحسین پیش کرسا اوفتے شاباسی تس و شینکاری ٹی آب اٹ کاریم کننگ نا ستاءِ کرے۔ محکمہ کانود نا افسر آک دا اہم انگا امور نا پورو کننگ اٹ کاٹم خواجہی و است بڈی کننگ آ پارلیمانی سیکرٹری کانود و پارلیمانی امور ڈاکٹر ربابہ خان بلیدی نا منت ءِ ہرفسا دا گام ءِ محکمہ کانود بلوچستان ناتاریخ اٹ اہم ءُ سنگ میل اس گوندار۔ ڈاکٹر ربابہ خان بلیدی پارے کہ پورو کروک آ آخریکو والیم آک گدرینگوک آ 29 سال آن سلوک ئسر ہرافتے الحمدللہ اپ ڈیٹ کننگانے۔

(خ ن)