بولان، ریلوے ٹریک آ دھماکہ، جعفر ایکسپریس نا کیہی مسافر ٹھپی

کوئٹہ: بلوچستان نا ضلع بولان اٹی ریلوے لائن آ دھماکہ اس مسنے، ہراڑان جعفر ایکسپریس نا 3 بوگی پٹڑی آن شیف تمار۔ و کیہی مسافر ٹھپی مسر۔ حوال آتا ر داٹ بولان اٹی نا درست دہشت گرد آک مشکاف نا ہند آ ریلوے لائن آ بارودی مواد تخاسر، ہرافتا ترخنگ آن کوئٹہ غان راولپنڈی کن ہنوک آ جعفر ایکسپریس نا 3 بوگی پٹڑی آن شیف تمار، ہراڑان کیہی بندغ ٹھپی مسر۔ ولے مسافر تا حالیت نازرک اف۔ دھماکہ نا حوال رسینگ تون ریلوے انتظامیہ و ریسکیو ٹیمک واقعہ نا جاگہ غا سر مسر۔ وزیراعلیٰ بلوچستان عبدالقدوس بزنجو مشکاف ریلوے اسٹیشن نا خڑک آ ریلوے ٹریک آ دھماکہ نا مذمت ءِ کرسا پارت کرینے کہ ٹرین مسافر تے دمدستی ریلیف و گچین طبی آسراتی فراوان کننگے۔ وزیراعلیٰ بلوچستان میر عبدالقدوس بزنجو مشکاف ریلوے اسٹیشن نا خڑک آ مروک دھماکہ نا مذمت ءِ کرسا پارے کہ مسافر ٹرین آ دھماکہ ارمان و گڑتی نا ہیت اسے۔ وزیراعلیٰ دھماکہ غان دمدستی پد ضلعی انتظامیہ ءِ ٹرین مسافر تے کن ریلیف سرجز آتا بناءِ کننگ نا پارت کرے۔ و ٹھپی تا گچین درمان نا خیالداری نا ہم پارے۔ و دا رداٹ ہسپتال آتیٹی ایمر جنسی خلنگ نا پارت کرے۔ وزیراعلیٰ مسافر ٹرین ءِ دہشت گردی اٹ شست کروک آ کاروائی لغوری و بھاز شیف ءُ کاریم اس پارے۔ او پارے کہ واقعہ نا زموار دہشت گرد آتے اسُل بشخپنہ۔