حکومت سال، تو، یا ہفتہ آخا منہ دے نا مہمان ءِ، مریم نواز

اسلام آباد: مسلم لیگ (ن) نا نائب صدر مریم نواز پارینے کہ میاں نواز شریف زُو پدی بریک، بننگ نا وخت ءِ پارٹی پک کیک، ملک انا فائدہ ہنداٹی ءِ کہ ملک ءِ آئین و کانود نا رد اٹ چلیفنگے۔ مسلم لیگ ن نا اسہ ایم این اے یا ایم پی اے اس ہم برّنگتنے، کل نواز شریف تون ہم کوپہ سلوک ءُ، پراگندہ بیر ہلنگ آتیان پد ہم ن لیگ پنتو، نیب پدریسہ بہانہ کرسا نرنگ نا کوشست کننگ اٹی ءِ، حکومت نا کارکڑد خراب اف، بلکن کاٹم آن ہچ ءُ کارکڑد اس تے اف۔ اسلام آباد ہائیکورٹ اٹی پیشی آن پد میڈیا تون ہیت و گپ کرسا نائب صدر ن لیگ نا پاننگ ئس کہ نیب پدریسہ بہانہ کرسا نرنگ نا کوشست کننگ اٹی ءِ، ای حیران اُٹ کہ دا ہمو نیب ءِ، ہرا اِرا تُو مست درخواست تسوسس کہ کیس ہڑدے چلینگے، ولے داسہ او ولدا وخت خواہسنے۔ ہراتم آن کہ عدالت شاہدی خواہسنے، نیب بہانہ کننگ ءِ۔ نیب انا کورونا بھاز مرغن مسنے۔او پارے کہ حکومت نا کارکڑد گندہ اف، بلکن کاٹم آن ہچ ءُ کارکڑد اس تے اف۔ پاننگک کہ ن لیگ نا چار بندغ اوفتتون ملانو، ن لیگ نا اسہ ایم این اے یا ایم پی اے اس ہم پنتنے، اوفک تلار آنبار نواز شریف تون سلوک ءُ۔ عمران خان نا باسک آک مون پہ مون بے شرفی ءِ کننگ اٹی ءُ، و حکومتی نابود تیا پِٹنگ ءُ۔ مریم نواز پارے کہ فواد چوہدری نا بیان بیرہ ویل آتیان چاکر ءِ اینک کننگ و تینا نابودی تے ڈکنگ کن ءِ۔ نواز شریف نا پارٹی اسہ بھاز بھلو عذاب اسے آن گدرینگ انگ ءِ، پراگندہ بیر ہلنگ آتیان پد ہم پارٹی پنتو۔ پاکستان داسہ دا حکومت ءِ اسہ دے اس ہم سگنگ کپک۔ مسلم لیگ ن نا راہشون مریم نواز پارے کہ ہچ سما اف کہ بنجائی وفاقی وزیرداخلہ ءِ کاٹم خواجہی مننگ نا ہیت ءِ کننگ نا انتئے گرج مس؟ وزیر تا بیان تیان لگک کہ اوفتا دیک کٹانو۔ کنے لگک حکومت سال، تُو یا ہفتہ غاتا آخا منہ دے انا مہمان ءِ۔ دا حکومت نا نابودی تا ڈیمبری تموک ءِ۔ مری ٹی اوفتا نابودی آن نہادی جانک زیان مسر، و کیہی خاہوت بے سیخا مسر۔ برف اٹی مخلوق نا قبر آک جوڑ مسر۔ ولے حکومت ءِ بوڑ کنتو۔ و دا سیاسی بیان بازی تیٹی لگوک ءُ۔ او پارے کہ کوئٹہ ٹی ہزار ہ برادری نا لاش تیا وزیراعظم پارے کہ ای بلیک میل مفرہ، مری ٹی مخلوق کسک و وزیر اعظم بند کوٹھی ٹی خاچوک ئسکہ۔ شہباز شریف نوکاپ نا دیر اٹ دڑنگا تو اوفک ودے شوباز پاریر، لگک کہ عمران خان شہباز شریف آن آتے بٹنگ انگ آن پد مخلوق نا کمک آ کاہک۔ دا اولیکو حکومت ءِ ہرا مرک آتا زموار الس ءِ گوندانے۔ وزریر داخلہ بیان بازی کپ، سانحہ مری نا ورندی ءِ ایتے۔ او پارے کہ نواز شریف زُو پدی بریک، اونا پدی بننگ نا وخت ءِ پارٹی پک کیک، او اینو ہم پاکستان نا پنی آ راہشون ءِ۔ پاکستان نا فائدہ ہنداٹی ءِ کہ ملک ءِ آئین و کانود نا رد اٹ چلیفنگے، ڈیل ڈھیل انا چم بازیک کاریم اٹ اتنگپس۔ او پارے کہ عمران خان بایدے تینا ورلڈ کپ اٹی چنک اس دیر شاغے تینے گدر کے۔ حکومت ءِ بٹنگ کن اخس کہ اشتاف پی ڈی ایم کننگ ءِ، اوکان زیات حکومت نا جند تینٹ تمنگ خواہک۔ دا شوا کننگ ءُ، قوم ءِ جوان سما ءِ کہ حکومت نا بدلی نا وڑ ہم مونیب سنے۔ ولے کل آن مست دا نابود آ حکومت آن جان ءِ چٹفوئی تمک۔