شونداری کاریم تا بابت ڈیوالئی سگپنہ، وزیر اعلیٰ بلوچستان

کوئٹہ: وزیراعلیٰ بلوچستان میر عبدالقدوس بزنجو پارینے کہ شونداری کاریم تا بابت ڈیوالئی سگپنہ، صوبائی دارلحکومت اٹی دیر انا کاختی نا ویل بھلو چیلنج اسے، اوغانستان اٹ بدلی نا زہم بلوچستان آ ہم تمانے، زُو امن ایمنی نا حالیت آک گچین مریرہ، شار انا گچینی کن سول سوسائٹی ہم تینا کڑد ءِ سر ایتے، سریاب روڈ آ کاریم یک و نیم سال آن سلوک ءِ، مچٹ اس افسرآتا ردینک آک ءُ، ننا نزوریک ہم اریر، دا ہیت آتے او تدوک آ دے سریاب روڈ نا ورہ نا وخت آ میڈیا تون ہیت و گپ کرسا کرے۔ وزیر اعلیٰ پارے کہ کوئٹہ پیکیج نا رد اٹ دا سڑک آ کاریم یک و نیم سال آن سلوک ءِ، یک و نیم سال اٹ گڑاک جوان مننگ کتنو، میر عبدالقدوس بزنجو پارے کہ شونداری کاریم تا بابت ڈیوالئی تے سگپنہ۔ داخس وخت اٹی صوبائی دارلحکومت نا ماسٹر پلان اسکان ہم جوڑ مننگ کتنے، الس نا فائدہ کن ہر فیصلہ ءِ کینہ، شار انا گچینی و سفائی کن سول سوسائٹی ءِ ہم تینا کڑدار ءِ سر تروئی تمک، او پارے کہ ساڑی صوبائی حکومت کل بند شونداری کاریم تے ملنگ اٹی ءِ۔ صوبائی دارلحکومت اٹی دیر انا ویل بھلو چیلنج اسے، اوغانستان اٹ بدلی نا زہم بلوچستان آ ہم تمک، ولے امن ایمنی نا حالیت زو گچین مریک۔ داکان بیدس وزیراعلیٰ بلوچستان میر عبدالقدوس بزنجو بلوچستان اسمبلی ٹی چندی باسک آتا سوج آتا ورندی تے ترسا پارے کہ گونڈ ءُ وخت اسے ٹی 9 سد آن زیات فائل کشانٹ، اسٹاف و افسر آتے پارت کننگانے کہ اسہ فائل اس ہم مسہ دے آن زیات توننگپ۔ خضدار آن پد مستونگ و سوراب اٹی ہم ٹراما سینٹر تفنگک، تاکہ قومی شاہراہ غا شکست آتیان پد ٹھپی تے وخت آ درمان رسینگ کے۔ اسمبلی ٹی باسک آتا چست کروک سوج آتا ورندی ٹی وزیراعلیٰ بلوچستان پارے کہ ای داتم اسکان نہہ سد آن زیات فائل کشانٹ، و تینا اسٹاف ءِ پارت کرینٹ کہ مسہ آن زیات فائل آتے توپیرے۔ وزیراعلیٰ جمعیت علماء اسلام نا صوبائی اسمبلی نا باسک یونس عزیز زہری ءِ باور کرفے کہ ٹراما سینٹر خضدار نا فائل ءِ چار دے مست دستخط کرسا کشانٹ۔ او پارے کہ مستونگ و سوراب اٹی ہم ٹراما سنٹر جوڑ کننگ انگ ءِ، تاکہ شکست آتیان پد ٹھپی تے وخت انا زی آ درمان رسینگ کے۔ وزیراعلیٰ بلوچستان پولیس نا کنڈ آن نیاڑی تا دزگیری نا بابت پارے کہ سوشل میڈیا غا ویڈیو وائرل مننگ آن پد اونا نوٹس ءِ ہلکٹ۔ آئی جی ءِ پارت کرینٹ کہ تعلقدار کارندہ غاتے اینک کرسا اوفتا برخلاف کارراوئی کننگے، تاکہ داکان پد کس بے شرف مف۔