رمضان پیکیج نا راشن تا انصاف اٹ بشخنگ ءِ پک کننگانے، منیر درانی

قلات: ڈپٹی کمشنر قلات منیر احمد درانی پارینے کہ روچہ پیکیج نا رداٹ حقدار آ بندغ آتیٹی راشن نا بشخ و پانٹ ءِ پک کننگانے۔ قلات نا گچین آ اُلسی نمائندہ غاتا فراوان کروک آ مہشون و گڑاتا ہننگ آن پد حقدار آ بندغ آتیٹی راشن بشخ وپانٹ کننگانے۔ او پارینے کہ وزیراعلیٰ بلوچستان میر عبدالقدوس بزنجو و صوبائی وزیر داخلہ بلوچستان میرضیاء اللہ لانگو نا کنڈآن روچہ پیکیج نا پڑو ءِ کننگاسس۔ ہرادے اینو پورو کننگا۔ منیر احمد درانی پارینے کہ اُلسی ویل آتے اوفتا پاننگ آ ایسر کننگ نا خواہندار اُن۔ دا خیال آتا درشانی ءِ او روچہ پیکیج نا رداٹ حقدار آ بندغ آتیٹی راشن نا بشخ وپانٹ نا وخت آ اے ڈی سی فدابلوچ و گچین مروک آ نمائندہ غاتے گڑاتا حوالہ کننگ نا وخت آ کرے۔ اوکان گڈ ڈپٹی کمشنرقلات منیراحمددرانی نا خاص ءُ پارت آتا روشنائی ٹی ایڈیشنل ڈپٹی کمشنرقلات فدابلوچ قلات نا گچین آ اُلسی نمائندہ نا ساڑی گری ٹی ضلع قلات نا حقدار آ بندغ آتیٹی راشن بشخ وپانٹ کرے۔ ایڈیشنل ڈپٹی کمشنر قلات فدا بلوچ پارینے روچہ مبارک اٹ نادار و حقدار آ خاہوت آتے ریلیف تننگ کن صوبائی حکومت نا پارت آتا روشنائی ٹی وسیلہ غاتیان کاریم ہلنگک۔ او وخت آ حقدار آ خاہوت آتا بندغ آک وزیراعلی بلوچستان میر عبدالقدوس بزنجو، وزیرداخلہ بلوچستان میر ضیاء اللہ لانگو ڈپٹی کمشنرقلات منیر احمد درانی، ضلعی انتظامیہ و اُلسی نمائندہ غاتا منتواری ءِ ہرفسا پارینے کہ حقدار آ بندغ آتیٹی حقدار آ بندغ آتیٹی روچہ پیکچ نا رداٹ راشن نا بشخ و پانٹ ستا کڑزک۔

(خ ن)