صدر علوی نا چینی وزیراعظم تون اوڑدہی ، کرونا نا برخلاف چین اتون یکجہتی نا درشانی

بیجنگ(اے پی پی) صدر مملکت ڈاکٹر عارف علوی چین نا وزیراعظم لی کی چیانگ تون اوڑدہی ٹی کرونادَین انا برخلاف چین اتون پورو یکجہتی و پاکستان نا کنڈآن مخ تفی نا درشانی ءِ کرینے۔ ہڑتوم آ راہشون تا نیام اٹ اوڑدہی بیجنگ نا گریٹ ہال اٹی مس۔ صدر مملکت داوخت آ پارے کہ پاکستان و چین ہر آزمائشت آ پورو بروک آ سنگت و سوگو آ ایلمک ءُئ ± ہرا مدام اسہ ایلو تون سلیسنو۔ ہڑتوم آ ملک آتا تعلقداریک تین پہ تینی پت و فائدہ تروک کمکاری آ مبنی ئ ±۔ اوپارے کہ پاکستان و چین دنیا ءِ پارینو کہ او تین پہ تینی شونہالی و نیام تمپننگ آ باور تخرہ۔ صدر مملکت پارے کہ پاکستان مدام مشکل وخت اٹی چین اتون تفینے و کرونا وائرس نا دَین اتون مون تننگ نا چیلنج اٹی ہم اونا مخ تفی ءِ برجاتخک۔ اوپارے کہ چین کرونا دین انا توننگ کن گچین گام گیج کرینے۔ داوخت آ چینی وزیراعظم صدر مملکت و اونا ڈل ءِ بخیر کرسا پارے کہ چین وپاکستان نا سنگتی وخت اتون پین سوگو مسنے۔ اوپارے کہ چین اٹی کرونا وائرس آن ودی مروک آ دَین آ وزیراعظٰم عمران خان و پاکستان نا حکومت چین اکن ہمدردی نا درشانی نا کلہو آتے مون تسر و دَین انا تالان مننگ آن دمدستی پد پاکستان چینءِ طبی امداد فراوان کرے۔ نن چین اٹی پاکستان نا خیر خواہی نا جوزہ غا منت واراُن۔ چینی وزیراعظم پارے کہ چین سمجھک کہ پاکستان اٹی ہم داسہ کرونا وائرس نا گڑاس کیس ظاہر مسنو ہرافتا رداٹ حکومت پاکستان گام گیج کننگ ءِ۔ ننے داوڑنا چیلنج آتون اسیجا وڑاٹ مون تننگ کن تینا کمکاری ءِ ودفنگ نا گرج ءِ۔ نن دا بابت پاکستان تون اواری اٹ کاریم کننگ خوانہ۔ اوپارے کہ انسانیت ءِ مون تروک دا چیلنج نا رداٹ جہانی کمکاری بھاز اہم ءِ۔ داوخت آ وزیر خارجہ شاہ محمود قریشی ، بنجائی وزیر ڈٹ بندی ، شونداری و اصلاحات اسد عمر، چین نا وزیر خارجہ ، چین اٹی پاکستانی سفیر و ایلو سینئر کمامدارآک ہم ساڑی ئسر۔