کرونا نا برخلاف الس کمک کے، سرسہب مرینہ، عمران خان

اسلام آباد (اے پی پی) وزیراعظم عمران خان کرونا وائرس نا بابت گام گیج آتیا اُلس آن تران اٹ پارینے کہ کرونا وائرس ءِ پین تالان مریک ننے پام کروئی ءِ۔ خلنگ نا اف، نن دا جنگ ءِ کٹنہ۔ وزیراعظم عمران خان اُلس آن تران کرسا پارینے کہ کرونا وائرس نا بابت اٹ خُلیس ودی کننگ نا گرج اف، کرونا وائرس نا جوانی دادے زوت اس تالان مریک ہرانا 90 درسد ناجوڑ آتے بیرہ نزلہ و زکام مریک۔ او پارینے کہ وائرس آن زہمی بیرہ 4 یا 5 درسد ناجوڑ آتے ہسپتال آ اتنگ نا گرج مریک۔ و 97 درسد ناجوڑ آک جانجوڑی مریرہ۔ او پارینے ننے دا معلوم ئس کہ چین اٹ کروناوائرس تالان مسنے تو پاکستان آ ہم بریک۔ وائرس نا بنا ٹی پدریسہ نن چین تون حال احوال اسن او ایران تون ہم نن چڑہ حال احوالی اسن، انئتئے کہ چین آن پد ہمسایہ ملک ایران اٹ ہم کرونا وائرس تالان مس۔ بلوچستان حکومت ءِ مبارکبادی ایتوہ، وزیراعظم پارینے کہ بلوچستان حکومت سخت انگا حالیت آتیٹی بھاز کوشست کرے او بلوچستان حکومت ءِ دا گام گیج آتیا مبارکبادی ایتوہ۔ او مستی پارینے کہ تران نا مسخت اُلس ءِ کرونا وائرس نا بابت گام گیج آتیا سلاہ ٹی اتوئی ئس۔ اولیکو کیس 26 فروری آ بس، نن تدوک آ ہفتہ ٹی 20 کیس مون آ بننگ آ قومی سلامتی کمیٹی نا دیوان اس بٹنگان۔ وزیراعظم عمران خان مستی پارینے کہ اٹلی ٹی بنا ٹی ہچ اس الو او ہراتم کہ کیس آک ودار تو لاک ڈاو ¿ن خلک، امریکہ و برطانیہ ہم تینا شار تے بند کرینو، ننتون ہم شار تے بند کننگ نا بابت سجفنگ اٹی اُن ولے پاکستان اٹ او حالیت آک افس انتئے کہ ہراتم نن شار تے بند کینہ تو اسہ کنڈآن اُلس کرونا غان بچک تو ایلو کنڈ آ بینگی آن کہک۔ او پارینے کہ ولدا نن دا فیصلہ کرین کہ اسکول کالج و اُلسی اجتماع تے بند کرینن، او کوارڈی نیشن کمیٹی اس جوڑ کرین ہرانا 2 پلو ءُ اسہ صوبائی حکومت آک او ایلو این ڈی ایم اے ءِ، نن این ڈی ایم اے ءِ فعال کرین او اودے پیسہ تسن، 4 آن 5 درسد اُلس ءِ ہرا کرونا وائرس نا اٹیک مریک اوفتے کن وینٹی لیٹر نا گرج مریک او حکومت وینٹی لیٹر آرڈر کرینے۔