کرونا، چیف سیکرٹری بلوچستان نا کماشی ٹی بڑزکو کہولی واکداری کور کمیٹی اس جوڑ

کوئٹہ(آن لائن)حکومت بلوچستان کرونا وائرس نا توننگ، رکھنگ نا بابت گام گیج و ہسپتال آتے ٹی کرونا وائرس آن زہمی بندغ آتا درمان کن آسراتی تننگ ءِ پک کننگ کن برجا انگا گام گیج آتے پین جوان کننگ کن چیف سیکرٹری بلوچستان نا کماشی ٹی اسہ بڑزکو اختیاری کور کمیٹی اس جوڑ کرینے۔ کمیٹی ہڑدے نا بنداو آ دیوان اس اڈ ترسا کرونا وائرس نا حالیت آتا جاچ ءِ ہلسا محکمہ جانجوڑی، پی ڈی ایم اے، سیکیورٹی ادارہ و ایلو محکمہ غاتے گائیڈ لائن تننگک او دا بابت اٹ برجا انگا گام گیج آتا نگرانی ءِ کینہ۔ کمیٹی طب انا ماہر تا سلاہ ٹی اُلس، ڈاکٹرک، طبی و سیکیورٹی کمامدار آتے کن کورونا وائرس آن رکھنگ کن ایس او پی اس ہم جوڑ کننگک۔ ہراڑا زوت اس عملدرآمد نا بنا کننگک تانکہ وائرس نا تالانی ءِ توننگ ممکن مننگ کے۔ کمیٹی نا کنڈآن ہڑدے وزیراعلی ءِ رپورٹ پیش کننگک، کمیٹی ٹی ڈبلیو ایچ او نا نمائندہ، پبلک ہیلتھ نا ماہرک، سینئر ڈاکٹرک، پروفیسرک، ینگ ڈاکٹر ایسوسی ایشن نا نمائندہ غاک، سینئر سول آفیسرک، انٹیلیجنس ایجنس آک، سدرن کمانڈ و سیکیورٹی ادارہ غاتا کمامدار آک ہم اوار مریرہ۔ کمیٹی کرونا وائرس نا توننگ کن انسانی وسیلہ و فنڈ آتے جوان وڑ اٹ کاریم اٹ اتنگ ءِ پک کیک۔ دا ہیت انا فیصلہ وزیراعلی بلوچستان جام کمال خان نا کماشی ٹی اڈ ہلوک بڑزکو کہولی دیوان اسے ٹی کننگا۔ وزیراعلی دیوان آن تران کرسا پارینے کہ کروناوائرس نا چیلنج تون مون تننگ کن اسہ جوان ءُ ٹیم ورک اسے نا گرج ءِ۔ ہراتم ہر محکمہ تینا کاریم ءِ جوان کیک تو دا چلینج تون مون تننگ اٹ سرسہبی رسینگک۔ وزیراعلی پارینے کہ حکومت بلوچستان انسانی ہمدردی نا بنداو آ تفتان اٹ زائر تے کرنٹائن نا آسراتی تننگ کن جوان گام گیج کننگا او کل وسیلہ غاتے تننگا۔ تفتان آمبار انگا مُر انگا و پد تموک آ علاقہ غاتے ٹی ہراڑے بیرہ اسہ بی ایچ کیو اس ساڑی ءِ، پنچ ہزار زائر تے رہنگ انگ و اسکریننگ نا آسراتی تننگ ءِ ممکن کننگک۔ او پارینے ایران آن پین زائر تا بننگ نا گمان ارے۔ وخت اس کہ تفتان اٹ ساڑی آسراتی ءِ پین جوان کننگ نا گرج ءِ۔ وزیراعلی گمان کرینے کہ ڈبلیو ایچ او، صوبہ نا پبلک ہیلتھ ماہرک، سینئر ڈاکٹرک و ینگ ڈاکٹر تے کرونا وائرس تون مون تننگ کن حکومت نا کمک ءِ کرسا جوان ءُ کڑد اس ادا کروئی تمک۔ حکومت ڈاکٹرک و ایلو طبی کمامدار آتا رکھ ءِ پک کرسا اوفتے المی کٹ و آسودگی تننگک۔